【本報訊】一個是曾經放貴利、賣白粉、食大麻的黑社會成員；一個在10歲時來港，放學後要撿汽水罐幫補家計的新移民。今天，他們都是傑出人士。10大傑出青年選舉2008昨日公佈結果，選出8位傑出人士，包括坐過牢卻成功更生的姜炳耀，以及憑努力由新移民變成公司副總裁的洪為民。
不為百萬動心
「以前係遺害社會，而家係造福社會，生活好唔同。」40歲的姜炳耀曾是不斷進出拘留所的黑社會分子，「15歲第一次入拘留所，咁耐入荔枝角拘留所超過10次，仲有兩次去喜靈洲戒毒所。」放貴利、賣白粉、食大麻，他統統試過。01年一次瘋狂行為，成為他一生的轉捩點，「嗰次食咗好多丸仔，失晒常性，返到屋企追住阿爸嚟斬，好在有朋友及時阻止。」他被判到福音戒毒村，02年出獄並成功戒毒。
獲選為傑出青年，姜炳耀感激太太一直對他不離不棄。「我哋97年開始拍拖，喺01年我都仲放緊貴利、賣緊白粉，但佢冇放棄我，話覺得我可以改變。」多得太太提醒，他沒有重蹈覆轍。「02年出獄後，曾經打電話畀以前啲兄弟，佢哋話收咗百幾萬嘅數（高利貸），叫我快啲攞。」當時他身無分文，家中的尼龍床都是借回來，金錢對他誘惑很大。「佢(太太)叫我唔好攞，因為咁難得先返出嚟。如果想改過，我就唔再屬於嗰個世界。」他在04年成立一所社會企業，幫助在囚、更生人士及戒毒者。「我唔會同佢哋（吸毒人士）講唔吸毒就可以成為傑青，我會話佢哋知吸毒嘅禍害，一定要改過，先可以企返起身。」
另一位得獎者洪為民10歲時來港，曾住板間房、木屋及臨屋，放學後要撿汽水罐、鐵線變賣，幫補家計。「雖然貧窮，但我有個快樂童年。自細父母就教我不怨天，不尤人。」
是次八人當選
憑努力他現為一間公司的執行副總裁，亦參與多個志願團體，特別關注青少年服務。「教育對青少年最重要，每個青少年都可以由平凡變做不平凡。」
是次選舉的籌委會主席林君量解釋，今年只得8名得獎者，「每年畀評判嘅指引係不多於10個，所以係可以少過10個，唔想勉強去選，應該貴精不貴多，以前都試過得5、6個。」評判團會以提名人士在行業、工作上的表現，以及對社會服務的熱誠和貢獻作評審準則。
2008年度10大傑出青年
得獎者：陳力元 職業：中文大學內科及藥物治療學系教授
獲獎原因：就肝炎和肝癌發表文章超過280篇，贏得多個研究員獎
得獎者：陳美玉 職業：註冊音樂治療師
獲獎原因：四川地震後以音樂治療災民心理
得獎者：錢國偉 職業：香港中樂團敲擊助理首席
獲獎原因：創立香港敲藝團，發揚中國敲擊文化及參與公益活動
得獎者：何嘉麗 職業：民政事務局項目經理
獲獎原因：香港精英運動員協會執委；「兩地一心」青年大使協助重建中國山區學校
得獎者：洪為民 職業：昊新有限公司執行副總裁
獲獎原因：10歲時為新移民，曾住板房間，憑努力成為公司高層
得獎者：姜炳耀 職業：立新服務有限公司營運總監
獲獎原因：曾入黑社會，改過自新後成為社會企業營運總監
得獎者：賴旭佑 職業：中文大學眼科及視覺科學學系副教授
獲獎原因：在國際醫學雜誌發表逾100篇眼科學術研究文章；參與「亮晶工程」，為內地貧苦大眾提供白內障手術
得獎者：汪明欣 職業：作家兼多媒體創作人
獲獎原因：本港首名失明女作家兼多媒體創作人，推出了四本著作及多首音樂作品
資料來源：國際青年商會香港總會
傑青回應
