傅穎（Theresa）前晚到九龍灣出席新城慈善卡拉OK活動，佢早排增磅成功，但老闆黃柏高睇完最近有關佢增磅嘅報道後，話以前佢瘦削嘅身形比較好睇，另外又有男fans投訴話鍾意佢以前嘅身形，Theresa話：「我呢幾日去做機同跳舞各兩個鐘，每日只食三餐，戒澱粉質，夜晚7點之後唔食嘢。」
為楊愛瑾解畫
問到𠵱家係咪佢磅數嘅高峯期？Theresa話早幾日係，好彩佢代言嘅纖體公司冇「詐型」，因為佢體重冇超過合約定明嘅110磅。好友楊愛瑾被傳搭上有婦之夫，Theresa話：「佢交遊廣闊，但佢唔係咁嘅人。我試過對個男仔有feel，但佢有女友，我就斬纜，我唔會做第三者。」
當Theresa同小肥喺台上演出時，欄外有位圍觀嘅19歲少女突然羊癇症發作，被送咗去聯合醫院，事後新城公關表示少女冇生命危險，Theresa就唔知台下有觀眾出事。
此外，Theresa噚日到奧海城為纖體公司出席宣傳活動，同場有幾位身形肥胖嘅「A貨Theresa」出現。講到方力申想搵Theresa緋聞男友Neal跑馬拉松，Theresa話：「我唔知佢哋有乜節目，我同佢（指Neal）好少見。」
Theresa又話如果自己有男友，就唔使日日喺屋企煲台劇。
