國內銀行上年業績標青，今年要諗辦法維持，開源節流係最直接方法。要開源，變相喺客人身上開刀。呢方面表現最積極嘅係交行（3328），話說國內銀行信用卡有免費短訊提醒通知服務，但據內地《新聞晨報》報道，交行上月開始收費，3個月要12蚊人仔，交行開咗呢個頭，唔知其他銀行跟唔跟？
此外，用開借記卡（類似我哋嘅EPS，要有錢喺戶口先可以碌卡）嘅同胞都係開刀對象，浦發銀行嘅東方卡，原本係國內碩果僅存唔收手續費嘅借記卡，𠵱家都開始收費，而且項目繁多，經常用到嘅㩒錢同存錢服務係開源目標之一，喺開卡城市以外櫃員機㩒cash，每次手續費最少收3蚊人仔，存cash最低消費兩蚊人仔。雖然數目唔大，不過大家再冇免費午餐囉。