同事暉暉年初生咗BB女，係頭一胎，開心到見牙唔見眼，但最近碰到毒奶肆虐，𠵱家仲連餅亁、米糊都話有毒，搞到頭都大埋，都唔知買乜嘢畀BB食。計小妹話齋，餵人奶最安全，另外再畀啲蔬果蓉BB食，補充其他營養。
消委會老友教路話，呢輪經濟唔好，自製蔬果蓉最好，又平又安全，好似去超巿買一樽蘋果蓉或蔬菜蓉，賣$6.9至$24，每餐份量100克計，每餐要6蚊至20幾蚊，如果自己整，每餐只係一至兩蚊，勁慳。
應24小時內食完
老友話蔬菜蓉好易整，以兩餐份量計，選料紅蘿蔔200克（也可用番薯或薯仔），洗淨去皮切粒，然後隔水蒸蔬菜粒10至15分鐘，蔬菜變腍後，加入適量嘅奶（最安全緊係用母乳啦）或凍開水，之後放入攪拌機打至幼滑即可。如果冇攪拌機，咪用鐵匙同篩網壓至幼滑，再混和少許奶。
自製水果蓉仲簡單，又係兩餐份量計，蘋果一個（可選用雪梨、啤梨或桃）洗淨去皮同去果核後切成小塊，再放入攪拌機攪勻，再加啲凍開水稀釋。如果冇攪拌機，可隔水蒸水果10至15分鐘，用叉將果肉壓成蓉。想再簡單啲，將水果連皮切開兩邊，去核後用鐵匙挖果肉成蓉。
製成蔬果蓉後，取出所需份量進食，其餘放落器皿關好蓋擺入雪櫃儲存，但要喺24小時內食晒。
電郵：mailto:[email protected]
逢周六、周日刊出