19歲的阿詩去年初在同學介紹下參加攝理教活動，包括話劇與音樂表演，「每次一大班年輕人。」當時她不知自己已成為攝理教「獵物」，「佢哋冇講過係攝理教，只叫自己做教會。」攝理教派了一名大學生女信徒「照顧」她，「每星期同我上聖經堂，上咗30堂，講吓罪惡、世界末日。」
阿詩憶述，該教派其後對其操控越來越強，不斷挑撥她跟家人與朋友的關係，「話唔好畀屋企人知返緊佢哋活動，又話如果父母阻止我返，就係魔鬼化身。當時我好信佢哋，𠵱家諗番轉頭，覺得俾人洗腦。」
女兒性情大變
她說該教派不斷灌輸「伴侶唔係自己揀」的訊息，「身邊嘅男性朋友唔係佢哋信徒，要絕交。教會將來會幫你安排完美嘅伴侶，由老師（鄭明析）或者上級幫你揀。」鄭明析在教內地位至高無上，「勁過耶穌，可以起死回生，係救世主。」幸她未正式加入攝理教，後來在正統教會協助下擺脫該教派。
不過並非人人那麼幸運。「阿女返咗呢個教派後，變得好古怪，成日神神秘秘。」李太的女兒小君，兩年前加入攝理教，自此性情大變，「將自己鎖喺房個幾鐘，出街化好濃妝，衣着打扮冇咁密實。」
她最初不知女兒參加涉及多宗性醜聞的攝理教，「幾乎晚晚出去，問佢去邊，有時話做義工，有時話睇話劇，次次講大話，唔肯講自己去攝理教聚會。」
李太發現真相後當面跟小君對質，女兒矢口否認，對那些性醜聞報道置若罔聞；其後發現小君反過來記錄她的行蹤，兩母女猜疑越來越深。
她說未滿20歲的女兒多次要求到南韓，稱是跟朋友旅行，她一直不准許，「我擔心佢同其他信徒去月明洞（攝理教聖地）見鄭明析。」她曾報警求助，但警方指其女兒年滿18歲，又沒有離家出走或被禁錮，拒絕受理，「我冇晒辦法，最擔心個女俾人搞。」
本報記者