經常聽到父母為照顧小朋友而吐苦水，話題不是圍繞「點樣同阿仔搵間好學校」，就是「我真係教仔教到好激氣」等等，不過，凡事都有例外，已經是一子一女之母的楊羚，在她身上似乎未發現這些煩惱，或許全憑她一套自創的管教之道，為免與子女傷和氣，功課方面她請來補習老師代勞，自己就專注康樂活動方面，她最希望的是一對子女可以開心快樂地成長。 撰文：何慧斯
來自演藝世家的楊羚，是老牌影視明星及粵劇老倌劉克宣的孫女，已故藝人劉志榮的外甥女，婚後淡出娛樂圈相夫教子的她，育有現年7歲兒子樂天和3歲女兒樂童。
最近楊羚復出擔任亞視節目《師奶妳好嘢》的主持，本來她多年前已經準備復出，不過因意外懷孕令計劃押後，她日前接受訪問時說：「嗰陣仲走去收身，點知意外有咗，所以咪又遲多三年先再算，其實全職湊仔嘅生活真係好枯燥，我唔想成日做重複嘢，所以一直都想有自己嘅興趣同少少兼職工作。」
楊羚表示現時的主持工作時間好，每晚6點收工，回家後還可以與小朋友吃晚飯，難怪她說：「我好開心同好享受𠵱家嘅生活，可以有自己嘅工作，但係又唔會影響照顧小朋友嘅時間。」由一個全職媽媽轉為半職媽媽，她笑言雖然未需要向一對仔女心理輔導，但事前都要與他們好好溝通，她說：「我同佢哋講媽咪𠵱家要返工，哥哥要錫妹妹，唔可以打交。」
哥哥愛錫妹妹
訪問當日，楊羚帶同子女到溜冰場，哥哥樂天在溜冰時，有很多基本動作都應付自如，妹妹樂童年紀尚小未掌握到溜冰的竅門，幸好有哥哥照顧，樂天的視線似乎未有離開過妹妹，楊羚表示兩兄妹爭風呷醋的情況甚少出現，她說：「我未生妹妹時，都有問過哥哥鍾意妹妹定細佬多啲，嗰陣哥哥話要妹妹唔要細佬，到後來知道係妹妹，我已經開始同佢講，第時要錫妹妹，所以佢成日走嚟錫我個肚，仲隔住個肚同BB傾偈㖭！」
樂天今年9月已升讀小一，談起適應期，楊羚不諱言比想像中輕鬆，她說：「最初我以為會好難適應，點知第一日返到學校，佢已經好開心，可能有一半同學仔都係佢幼稚園同學，好多高年級嘅哥哥姐姐又住埋喺同一條村，令到佢對新學校有安全感，所以比想像中易適應。」
不刻意揀名校
楊羚最初替兒子選擇學校時，沒有刻意揀名校，只堅守兩大規條，首選要有基督教背景，其次便是活動式教學，她笑說：「我希望佢哋可以開心返學，又唔使成日對住沉重嘅功課，就算返課外活動都係佢哋嘅喜好。」
提到教學方面，楊羚說：「功課方面我搵咗個補習老師教，我只係負責同佢哋玩，嚴肅嘅嘢由啲專業嘅人負責。」楊羚表示以前樂天讀幼稚園時，功課方面由她負責，但後來發覺效果不理想，所以她自創這套方法免傷和氣，她說：「哥哥讀幼稚園時，我教佢做功課，不過可能自己冇耐性，又冇方法令佢專心讀書，過程中產生壓力，最後搞到大家嗌交收場。」她又說：「嗰陣我唔係想催谷佢啲成績，只係怕拖落去冇時間同佢玩，成日家嘈屋閉，結果我覺得呢樣嘢唔啱我做，所以將呢啲嘢交俾專業嘅人做，咁我咪可以專心同佢玩。」
迫得緊反累事
正因為此，楊羚選擇補習老師亦有一套準則，她表示：「我唔係要一個淨係識得教佢背同讀嘅老師，我係需要一個有愛心、耐性，同埋識得鼓勵佢向前行嘅人，今日成績唔好唔緊要，記得下一次要努力俾心機。」
楊羚笑稱在家中負責康樂活動，安排食同玩的行程：「我都係一個賞罰分明嘅媽咪，如果佢哋乖嘅話，就去踩單車食雪糕，但表現唔好嘅話，即使已經安排咗活動都唔會去。」
無可否認，楊羚自有一套教兒方式，她表示與其他媽咪聚會時，有朋友會給予不少意見，她笑說：「佢哋成日叫我唔好呢樣、唔好嗰樣，應該安排啲乜，但可能我本身唔係一個太緊張嘅人，所以我會同佢哋講唔使啦，有啲嘢係應該喺幼稚園度學，點解要叫佢哋學咗先呢？咁到佢哋返學時又學啲乜？學習嘅時候應該俾佢哋喺開心嘅情況下進行，遇到鍾意嘅嘢先會努力追求，細個讀書已經覺得好辛苦同唔開心，將來都唔會好有興趣，反而仲會因為迫得太緊而令佢哋討厭。」
育兒心得：返教會學品行
對於管教小朋友的最大學問，楊羚表示莫過於「點樣教佢做好人」，她說：「身教固之然重要，但如果一個人個心諗歪咗，就算佢讀書好叻，有幾好嘅知識都冇用，做錯事坐一次監就乜嘢都冇啦！我好堅持要帶佢哋返教會，我覺得喺教會度可以好清晰咁睇到品行，好清楚知道自己要啲乜嘢。我唔會強迫佢哋將來一定要接受，但係𠵱家我會好堅持要佢哋喺教會呢個環境下成長，從小培育良好既品行。」
