超人李嘉誠早前大嗱嗱用一億美金私人入股嘅社交網站Facebook，繼首席營利總監、首席營運總監同產品管理副主席等幾位高層離開後，共同創辦人莫斯科維茨一個月內就會離開親生仔，自立門戶。據《華爾街日報》報道，佢帶埋由Google跳槽到Facebook嘅電腦工程師羅森斯坦，齊齊成立軟件開發公司。綜合媒體報道，佢哋話開發緊嘅企業軟件似乎融合唔到Facebook，索性成立間新公司，希望同Facebook互補不足咁話。
不過自從微軟上年10月用兩億四美金入股Facebook之後，過去年半時間，啲高層就好似排住隊咁起身走人，𠵱家連創辦人都離巢，又會咁啱嘅呵？