雷曼爆煲喺香港引發嘅追討風波，再次引證咗Banker凉薄嘅天性。苦主喊晒口求見銀行代表，喺呢個風頭火勢，作為雷曼迷你債券喺香港嘅信託人，滙豐銀行高層安慰說話都冇句，仲喺大氣電波講埋晒啲風凉話。
滙豐銀行執行董事王冬勝噚日上電台，講到金融海嘯，認為香港銀行體系健全，只係股票市場近期比較波動，人心不穩。佢話企業需要喺呢個時候控制成本，但相信唔會爆發大量裁員潮。呢啲官腔冇所謂，當係浪費人民電台嘅airtime。點知越講越唔似樣，佢話若然香港人喺香港搵唔到食，可以考慮返大陸甚至落南洋打工。唉！外邊如果真係咁好搵，又唔見班Banker開多幾間分行，請班香港人去搵食？