【本報訊】黃大仙出現「的士女殺手」！一名的士司機昨清晨在黃大仙接載一名女子往尖沙嘴途中，突遭車上的女乘客箍頸扯手襲擊，致的士失控撞毀路旁鐵欄鏟上行人路毀爛。涉案女子連忙落車狂踢車門後逃去，幸司機僅受輕傷拒絕送院，他對事件大惑不解：「佢可能食咗藥HIGH咗啩！」警方正從女子遺下相機等物品追緝其下落，警方列襲擊案處理。 記者：潘志能
離奇遇襲的士司機姓紀（43歲），他是於昨清晨5時許駕的士在彩虹道彩頤花園，接載一名年約20歲、穿白衣戴草帽、手持一個大膠袋女子往尖沙嘴山林道。
「開車冇耐佢不斷叫我開快啲，我已經盡量快但佢係咁催我，情緒好似好興奮咁呀！」司機講述事件仍驚魂未定。當的士駛至紅磡時，女子要求司機改往尖沙嘴漆咸道南嘉芙中心。
「用手拉揸軚嘅左手」
「當架車駛到漆咸道南理工大學游泳池對開時，佢好似女殺手咁突然喺後面用右手箍我條頸，又用手拉我揸軚嘅左手，一拉軚盤扭左，架車就失控撞埋左邊行人路鐵欄囉！」司機指事發得太快來不及反應。
的士撞毀10米鐵欄鏟上行人路衝向鐵絲網停下，車頭嚴重毀爛左車身凹陷，司機僅頸部受輕傷。
車上女子未有受傷，落車後狂踢車門，向司機拋下一句話:「我會幫你報警㗎！」遺下所戴草帽、一部數碼相機及清理貓隻糞便「貓沙」的大膠袋，向漆咸道北方向逃去。
「佢可能食藥HIGH咗！」
司機驚魂甫定後報警，接受救護員治理頸部傷勢後拒絕入院，他對事件表示不明所以：「佢可能食咗藥HIGH咗啦！」
市區的士司機聯委會主席郭志標表示，司機有權拒絕可能會滋擾安全駕車乘客上車如酒醉人士等，在開車途中乘客有異常行為時應立即停車：「駕駛安全最重要，應該立即停車叫佢落車或報警處理，乘客滋擾司機開車係犯法嘅，最高可被判罰三千元及入獄六個月。」