演藝界暗星要紅要成名，通常都係靠脫突圍，希望一鋪翻身。白鴿黨李華明亦終於等到翻身機會，但就靠個「苦」字！佢噚日喺電台節目自言從政16年嚟都係浮浮沉沉，從未上過十大議員排名榜。佢今日會同民建聯曾鈺成就競選立法會主席進行辯論，如果一個唔該搵到位窒到有詭辯奇能嘅阿曾，肯定紅爆YouTube，唔使俾毓民或者長毛獨領風騷，創出從政生涯高峯都未定。
安於平淡政治星途
不過，以上都係八方一廂情願嘅想法，因為肥仔明似乎都幾安於呢種平淡嘅政治星途，佢噚日接受商台訪問時更流露咗競選主席嘅無奈。係人都知，比例代表制同功能組別下誕生嘅議會，泛民好難攞到過半數，任何泛民議員去選主席都係得個桔。咁今次又為乜呢？肥仔明自稱從政16年，從冇做主席嘅心願，今次披甲上陣，都係「捱義氣」，知其不可而為之，作為泛民代表去搞吓局咁囉，邊會諗個贏字？
泛民本來想搵白鴿黨主席何俊仁出馬，點知有人認為仁哥上屆對撼范太時已經輸過一次，再輸多鋪唔多好睇，改為建議卿姐出馬。可惜積極備戰做財委會主席嘅卿姐唔多願意，而公民黨又一早講明五個議員都唔會參選，兜兜轉轉，呢嚿豬頭骨又係白鴿黨啃咗。
數嚟數去，白鴿黨議會資歷最深嘅都係張文光、涂謹申同肥仔明，而肥仔明又做過內會副主席兼代理主席，照道理都係三位中最熟悉議會運作，唔搵佢可能驚佢會嬲㖭。既然非佢莫屬，肥仔明都冇得推讓。面對住呢場幾乎係零勝出機會嘅硬仗，肥仔明只想輸少當贏，攞番少少face。
佢大呻曾鈺成喺立會選舉之後三日已經打電話畀新一屆議員拉票，肥仔明自己就不過係10日前先知道要去馬，時間上已經蝕章，惟有出口術力銷自己有唔少優點，例如係最穩重同溫和嘅反對派，兼且唔會搞親疏有別，主持議會又有經驗過曾鈺成，希望獨立議員留番少少票畀佢，唔使淨攞泛民23票咁肉酸。
迫到阿曾放棄投票
原來有市民得悉肥仔明去選主席，竟然以為佢有機會贏，係咁傳SMS恭喜佢一番，收到SMS嘅肥仔明真係有苦自己知。八方覺得佢今次參選都唔係完全冇作用，至少成功迫到曾鈺成做主席時放棄投票同評論政事。就算創唔到從政高峯，都會令唔少市民多謝佢。
mailto:[email protected]