前政務司司長陳方安生今年60有8，但多年嚟皮膚保養得宜，秘訣原來係每朝食乳酪做早餐。陳太噚日出席香港電台新節目《笑容從家開始》嘅宣傳活動，話自己一直有食早餐嘅習慣，就算當年做政務司司長幾忙都好，返工前梗會食一碗乳酪醫肚，加埋啲生果同果仁落去，多數係藍莓，味道一流咁話喎。
雖然食得咁健康，但陳太話覺得可惜，因為以前做公務員冇乜時間陪屋企人，要等到𠵱家退咗休，先至可以日日同個仔同埋乖孫一齊食飯。不過佢話幾享受生活都好，仲好關心政府施政，過兩日就會發聲明講關於即將公佈嘅施政報告。佢話社會好多問題未解決，包括政改方案、政府管治水平、行政立法關係、行政會議功能……總之問題多籮籮，煲呔唔好諗住蒙混過關。