今年5月四川大地震之後撲出嚟表示悲痛嘅特首曾蔭權，成功游說咗立法會批出20億公帑賑災之後，佢老哥就好似完成任務，四川災情已經好番晒咁款，一直冇動用過嗰20億。好多慈善團體向政府申請撥款上四川賑災，完全冇下文。
連美國前總統卡達（JimmyCarter）都睇唔過眼，今年7月去信曾蔭權，問佢究竟攬住筆錢咁耐幾時先肯放。卡達係代表緊一個名為HabitatforHumanityofChina嘅人道救援組織，對四川重建表示關注。特首辦話已經覆咗信畀卡達，但係講乜？筆錢幾時用？就一律唔肯講。納稅人大嗱嗱捐咗20億出嚟，煲呔當咗係私財咁秘而不宣。你話死唔死吖？