NBA新球季今個月28日開鑼，各球隊積極備戰之餘，亦好緊張季票銷售情況。梗係啦！金融海嘯之後，美國人手頭好緊，容乜易影響新球季入座率㗎？
有姚明助陣嘅侯斯頓火箭，近日就安排艾士頓、史高拉、蘭達利同夏利斯做電話推銷員，逐家逐戶打電話畀球迷，呼籲購買季票支持球隊。於是乎，侯斯頓呢個石油及「太空」城市，電話聲響個不停，唔知仲以為外星人襲地球㖭！
欠姚明無視中國市場
呢幾位打得又talk得嘅球星，以艾士頓最巴閉，成個饒舌歌手咁，「Yo!」幾嘢就說服到對方；蘭達利亦唔輸蝕：「舊年我30分鐘就賣出7套，今年要破紀錄！艾士頓暫時排第一，不過我會出色過佢！」呢班球星落足嘴頭，難怪電話入面不斷傳來少女尖叫聲啦！
火箭隊季票最貴20,900美元（約16萬港元），最平就396美元。不過我求大俠唔明點解唔搵姚明做推銷員，一來可以鍛煉佢啲英文，二來仲可以招攬當地中國球迷購買季票。而且全球最唔受金融海嘯影響係邊個國家啊？咪中國囉！火箭會方點可以忽略中國市場㗎？
其實，侯斯頓同深圳係廿幾年友好城市，中國人自從「神七」升天後，對火箭、太空等字眼特別亢奮。因此，只要火箭將主場豐田球場，改名為「中國神七」球場，再配合姚明呢個中國招牌，到時主場館肯定場場爆滿；正如前幾年香港實行內地自由行咁，人仔滾滾來，仲使搵球員做Sale屎咩？