中視金橋（623）7月上市以嚟，遇正大跌市，預期PE跌到得番3倍，大平賣。中視金橋係祖國傳媒廣告營運，集團公佈冇耐08年半年度（6月底止）純利，飆升咗20倍到4478萬銀（人仔．下同），已經靚爆鏡。睇埋下半年，相信北京奧運盛事，會帶動廣告需求，中視金橋一樣受惠，08年度唔少過1.2億銀嘅純利預測，應該冇點走雞，計計數，預期PE都係3字頭單位數。而祖國廣告市場商機無限，以咁低PE買有高增長前景嘅企業，實情大平賣。
中視金橋由7月上市8號高位2.76港銀，一路直插，家陣P/B1倍樓下，近磅股好似勤+緣（2366），P/B1.5倍樓上，講P/B，中視金橋一樣吸引。又中視金橋新股上市，街貨又唔多，整個技術反彈，亦唔係太難。中視金橋重返上市家鄉價2.63元，現價（1元）要升1.63倍，到時，預期PE都係啱啱過10倍水位。
大賀有大孖沙墊底
大賀媒體（8243）8個月插足8成，現價（0.192元）NAV折讓53%，往績PE跌到得番6倍幾。就當集團08年度無增長，只係keep到呢個PE水位，亦係抵買。
又今年頭，大賀獲淡馬錫旗下新傳媒入股，成為大賀第二大股東。大孖沙真金白銀投資，對大賀另眼相看。而新傳媒當時入股價，講緊約莫0.58元，即係話，現價入市，平過大孖沙一大截。大賀上番大孖沙入市價，講緊要升兩倍。
錢雋