大日子之真感覺--陳慧琳(Kelly)和劉建浩(Alex)前晚的婚宴,宴請圈中人有限,以圈外親友為多,但有份參加宴會的藝人都異口同聲表示,看到一對新人有情人終成眷屬,十分感動。其中狄波拉表示哭了幾包紙巾,謝賢也稱流了兩公升眼淚,欣宜感受氣氛之餘,覺得Alex不時流汗,非常可愛。
採訪:胡比、馬建華、娛樂突發組
攝影:陳順禎、葉君海、仇志德
鄭欣宜:冇搶花球
「場面好溫馨感人,我冇搶花球,但啲姊妹出晒去搶。Kelly爹哋同Alex講嘢部份最感人,Alex喺台上面有少少想喊,見佢不時標汗,好可愛。」
謝賢:男人心聲
「陳爸爸嘅講詞,講晒男人嘅心聲,真係好感動,我都流咗兩公升眼淚,嫁女真係好感人,第時我嫁女怕感動,唔請客囉。其中值得一讚嘅係司儀曾志偉,佢講咗好多笑話,令婚宴好好氣氛,第時我結婚都搵佢做司儀。」
狄波拉:婚宴100分
「呢個婚宴真係100分,大家等咗16年先見到呢對金童玉女結婚,好戥佢哋開心。見到佢哋簽紙同講感受,我哋大家都喊晒,喊濕咗幾包紙巾。我同Kelly奶奶夾好,傳授生仔秘方畀佢哋。」
Celia:兩度落淚
「今晚好開心好感動,我喊咗兩次,最感動係Kelly爹哋講嘢,全場喊晒,不過一對新人婚宴上唔係飲好多。」
劉偉強:佢好飲得
「現場氣氛好好,好感動,我都飲到醉醉哋。Alex好勁,佢好飲得。」
戴妮廷:全場感動
「大家好感動,新郎冇醉,志偉好風趣幽默咁喺台上搞氣氛,尤其是Kelly爹哋講嘢令大家好感動。」
花絮:收Cupcake手袋
陳慧琳嗜吃Cupcake,她平時會焗製請朋友品嚐,其中一位姊妹特別從外國選購了一個JudithLeiber限量版Cupcake小手袋(箭嘴示)給她,Kelly愛不釋手,前日更拿着它到達酒店。
回禮人人有份
一對新人除預備美心禮餅作回禮外,更有一個Cupcake形、由新郎哥Alex設計的飾物盒,分別有銀、白色兩款,頂部有一對新人的Q版公仔(圖),連fans和記者都有份,愛錫歌迷的Kelly更讓工作人員摘下婚宴佈置的花朵給fans做紀念。至於fans則送上禮物給Kelly,以及合唱一曲《一切很美只因有你》給新娘子欣賞。
全場暢飲近300支酒
前晚婚宴酒水共花了6位數字,包括在一位美國駐奧地利前領事的酒莊訂購04年紅酒HallNapaValleyMerlot和05年白酒StarLaneSauvignonBlanc,結果共飲了264支酒,該酒莊主人又送了一支大紅酒給一對新人作賀禮,另外前晚也喝了威士忌和白蘭地等18支烈酒。