今年上市新股數目真係寥寥可數，叫人最有印象嗰隻係中國南車（1766），原因都係佢股價夠硬淨，其上市至今雖未夠兩個月，其間港股大風大浪，南車仍可守穩招股價，梗係令散戶印象深刻。
逆風吹襲之下，昨日難得有隻新股華熙生物（963）掛牌，股價總算無失禮，在港股又再散528點，失守18000大關環境下，華熙不但全程力守1元招股價，兼在逆市中升4%，收1.04元，表現無令捧場客失望。
上石化回氣後可再升
新股表現看似未受近期淡風影響，確令散戶幾難明，不過家陣新股成功掛牌，或已反映幕後承銷或保薦等各方面單位「夠力」，如邏輯無錯，小注抽新股或有得諗。業務以國內地下商場作賣點的人和商業（1387）下周截飛，月中掛牌，該股傳有大孖沙認購。該公司預測截至今年底盈利不少於19億元人民幣，09年盈利目標更達32億元。
油價跌勢似轉急，近日跌至1.60元新低後即急彈的上海石化（338）應有一吼價值。
油價失守100美元，有利從事石化產品業務的上海石化股價轉穩，該股前日急升後，股價昨進行整固，惟未失守10日線1.81元支持位，料回氣後可再上，暫設短炒目標2.15元，跌穿1.60元止蝕。
方星俠