今年8月有市民喺西貢影到颱風鸚鵡嘅風眼，成為全城熱話。當時天文台都話考慮將張相放入鸚鵡嘅熱帶氣旋報告內。事隔兩個月，噚日公佈嘅報告卻唔見呢張相。天文台高級科學主任梁榮武同八方解釋，經多番考慮，認為張相科學性唔夠，睇唔到「眼壁」（eyewall），只可以叫係一張喺風眼裏面影到嘅氣象照片，所以最後冇放落報告書。不過，呢張始終係難得嘅靚相，於是改為放喺台長林超英嘅網誌 http://www.hko.gov.hk/blog/b5/index.htm。
影到呢張相嘅氣象迷李浩民就話，一啲都唔介意天文台嘅安排，仲話呢排風雨特別多，颱風一個接一個，遲啲又再出動，話唔定影到張更勁嘅相。