今次雷曼迷你債券風波，各個政黨無不出盡飲奶力為苦主出頭，其中白鴿黨就人多勢眾，既有新丁甘乃威，又有幫十姑娘打官司嘅主席何俊仁，仲要喺後面有支「御用大炮」李柱銘隨時可以用，大狀黨就賣專業，搵咗唔少專業人士幫手。民記淨係sell同阿爺關係，已經收落唔少cases。咁「丐幫」社民連又有乜賣點幫苦主呢？開頭八方以為佢哋都係靠衝靠撞，點知丐幫中人話八方梗係冇睇金庸小說，乜唔知丐幫出名多深藏不露嘅高手咩？佢哋丐幫入面就有「金融三俠」！
暗藏投資行CEO
呢個丐幫弟子話，咪睇佢哋班人平日着衫求求其其，其實個個都有獨門絕技行走江湖，好似「金融三俠」咁樣，其中一個叫阿Ed，咪睇佢平日好似行行企企，實情阿Ed喺某外資銀行客戶部做，呢間銀行就有賣雷曼債券，銀行用乜嘢正道、邪道sell客買雷曼債券，阿Ed可謂熟晒門路，一眼睇穿！
另一個就叫阿Will，佢就仲巴閉，平日喺社民連都係做吓擔擔抬抬，幫吓民間電台推下咪，但係佢真正身份，其實係一間投資行CEO，除咗炒嘢叻之外，拆解一眾金融產品仲叻。
最後一個就係佢哋副幫主，即係社民連副主席陶君行，佢老哥早排先考咗美國會計師牌，當時要讀埋美國監管法規同會計制度，𠵱家雷曼正正係美國投資銀行，喺美國法例下，雷曼破產之後，抵押品點處理？債權人又有乜嘢權益？雷曼苦主可以有乜保障，佢自然清楚喇！
八方於是問陶副幫主，咁究竟佢哋三俠坐埋一齊，研究到乜嘢呢？陶副幫主話，阿Ed間銀行屬於較守規矩銀行，內部指引話明，呢類雷曼債券，65歲以上嘅客唔賣得畀佢哋，所有客要填一份風險評估問卷，只要有任何一項填NO，同樣唔畀賣，仲要有合資格經紀，先可以sell客，若然間間銀行咁做，邊有咁多師奶、公公、婆婆連棺材本都輸埋！即係有人冇跟規矩做嘢，咁就有得拗喇！
阿陶副幫主同阿Will就研究雷曼債券究竟係乜，雖然陶副幫主好想用深入淺出方式，解釋畀八方知究竟迷你債券點可以令人血本無歸，但無論幾「淺出」都好，八方始終聽到一頭煙！陶副幫主只好用舉例，大約等於雷曼係莊家，銀行係艇仔，客就係賭仔，𠵱家個莊爆煲，艇仔唔認賬，客就唔論輸贏，連本都收唔番，血本無歸。
mailto:[email protected]