收到一位長期擁躉馮生嘅意見，想喺度表示謝意，當中我對「貼士叻，不如注碼叻」深感認同，所以我仍如季初策略，長追所謂banker球隊。就算不可能場場收錢，長追必有着數。今個禮拜，又係捧英甲列斯聯同英冠雷丁。
其實莊家唔驚你話邊個聯賽好賭，最驚你唔賭；最想公仔箱直播多啲，方便開多啲走地盤，等你補吓波膽玩對冲，結果射穿窿。賭波冇歇暑，較賭馬更似長期戰鬥，唔爭朝夕，半年或者一年後埋單計數；捧到好似日乙班霸廣島三箭，真係發達咯！不過小弟長捧兩支英格蘭低下級別嘅愛隊都唔失禮，英甲列斯聯全部賽事計勝率達7成半，雷丁差啲都有6成，初步睇幾對辦。
先講今天主打、排英甲第4位嘅列斯聯，作客另一支季初表現唔差嘅升班馬彼德堡，開出平手盤合理，冇乜鬼盤成份。上周貼列斯聯「主勝」包尾嘅赫里福特聯，結果後者死守下，列斯聯只能一球險勝。不過今次對手彼德堡攻得銳卻守不穩，主場4戰聯賽全開「大」，試過以5:4贏布里斯托流浪；列斯聯面對這類對手，其實更有贏波把握。
英冠「3哥」穩勝般尼
還記得列斯聯在季初直播英聯盃對乙組嘅車士打時，喺對手嘅窄場踢來揮灑自如，喺半場領先5:1下，卒大勝5:2。今次彼德堡球場亦屬「氹仔」格局，論質素列斯聯贏對手兩班（彼德堡升班，列斯聯若不是被扣分，今季應是英冠隊）；球隊在無重要傷停問題下，小弟要捧該隊上榜首方會罷休。兩隊鬥攻，波膽博「客其他」，60倍何妨一試？
過關一注，當然要捧入球「大」，串上周中到應嘅雷丁。雷丁上周輕取史雲斯，周中作客大破「1哥」狼隊；今次對手係級數唔曳嘅般尼，但後者周中3:2後上贏屈福特耗力甚巨。反觀雷丁剛將第3號前鋒列達借予諾域治，可想而知領隊郭甫對雙箭頭奇雲杜里同路爾亨特幾有信心；這支今季主場4戰俱炒對手嘅英冠「3哥」，又係我要捧到佢哋上榜首！
近5場往績：WLWWL
蘋果波神
水準有目共睹，長跟必有着數。