睇前《壹週刊》記者陳惜姿寫嘅長文「驗腎記」（《明報》九月二十八日），令人睇到好肉緊，知道佢位公子驗腎冇事，又為佢高興，陳惜姿個仔六歲，個女十一個月大，以前住在左丁山樓下，經常見面，後來大家都搬咗，但左丁山仍然記得陳惜姿與老公抱住個寶貝仔出門嘅樣子。
陳惜姿兒子飲咗唔少雀巢金裝奶粉，不時投訴小便刺痛，到最近先知道有三聚氰胺呢回事，當然憤怒之至。現在幾乎所有奶粉，含奶製品都在中國大陸製造，三聚氰胺如陰魂不散，無處不在，我哋好容易中招。最近流行一個不是笑話的笑話，就係：老實陳係中產階級，與老婆生下仔女各一，成個好字，收入穩定，生活幸福──直到今年中秋節。中秋節後，老實陳知道雷曼破產，自己買咗幾十萬雷曼迷你債券，自己與老婆嘅人壽保險係AIA嘅，兒子飲雀巢金裝粉奶，大女好喜歡飲蒙牛牛奶，太太鍾意日日飲兩杯伯朗咖啡，此外家中零食盤內滿是M&M、吉百利、小熊餅。老實陳嘅出糧戶口與紅簿仔儲蓄係東亞銀行。由九月十六日至九月二十四日，老實陳日日陷於緊張狀態，晚晚瞓唔着，到東亞銀行證實完全冇事，兒女驗腎冇事，AIA保單冇事，佢先至鬆一口氣，然後諗番自己啲雷曼迷債！
呢個笑話唔知會唔會真係射中某一批人，射中嘅話，主角點會笑得出。現實如此殘酷，唔怪得靚女主播Ｌ食飯嗰陣對我哋講：「現在好似慘過沙士嗰陣？」未必啩？市面仲未蕭條，酒店入住率好高㖭。但對中產階級嚟講，亞洲金融風暴後十年，休養生息完畢，再度享受好日子之時，又再碰上股市大跌、雷曼破產、投資銀行與滙豐裁員、樓價下滑，好似惡夢重來，心理壓力確係好大。主播Ｌ話佢嘅新聞系師姊嘅老公及兩個女幾年前已賣晒家當，買咗一隻普通船，內有兩間睡房，一家四口於是揚帆出海，到南太平洋群島「探險」，在水上生活，女兒讀書就由師姊教導美國一套自學課程，靠電腦與外間聯絡，如此無拘無束生活，令人神往，不過我哋講真，自己上船到南太平洋飄流嘅話，唔夠一個月，已經思鄉病發，要返嚟香港中環呼吸污染空氣咯！