佘詩曼日前接受商台錄音訪問，講起佢同鄭嘉穎嘅緋聞，佢話同嘉穎識咗六、七年，之前成日同曹永廉等成班朋友一齊食飯，可能就係咁俾人傳拍拖。
阿佘話之後都有同嘉穎聯絡，大家都覺得呢單新聞好搞笑，而且希望盡快搞掂呢件事，同埋阿佘話報道係出番一啲舊相就話嘉穎去佢屋企，佢澄清當時自己身在上海，佢仲講笑話等下一單緋聞蓋過呢一單。
講到鄭嘉穎呢位緋聞男友，阿佘覺得佢份人好cool、工作認真，同陳浩民絕對係兩種性格。當主持叫阿佘講吓前緋聞男友陳浩民，佢就話呢個人好out，佢哋有時喺大廈門口見到面會打招呼。
拒赴富豪飯局
此外，阿佘話自己好想結婚生小朋友，之前同過一個圈外人拍拖，可惜男友接受唔到佢成日冇時間，最後就分開咗，而佢最長嘅一段感情，都係維繫咗年幾。阿佘又透露有朋友介紹佢同圈外有錢人食飯，不過佢自己接受唔到而拒絕。另外阿佘話試過俾朋友出賣，將佢嘅秘密講出去，佢曾經好想開口問對方有冇咁嘅事。