衞生署教人每日要食三份蔬菜、兩份生果，食生果雖然健康，但好多人未必知食生果其實都有禁忌，亂食一樣會傷身。
最近喺《香港常用食物規格資料庫》嘅網頁，發現咗好多關於常見生果嘅有用資料，對一般人嚟講，最有興趣嘅資料莫過於唔同生果相宜、相冲嘅食物、有乜嘢人唔適合食等等，好似近排令人聞之色變嘅腎石問題，病人最好就唔好食士多啤梨嘞，因為士多啤梨嘅草酸鈣含量比較高，容易令腎石惡化。
橙可解酒不宜與蝦同食
呢個網頁有30幾種常見生果嘅資料，好似橙、香蕉、榴槤、西瓜、蜜瓜、奇異果、楊桃、柿等都有深入嘅介紹。例如講開嘅士多啤梨，唔單止維他命C同鎂質豐富，可以紓緩精神壓力，仲有養顏美容同幫助消化嘅功效，但係肺寒、咳嗽、脾胃虛寒、腹瀉、腹痛、腎石患者均不宜多吃。
橙係好受歡迎嘅飯後果之一，原來唔係人人啱食，因為橙含單寧酸，容易同鐵質、鈣質等礦物質等結合，尤其貧血同消化不良人士應該少食；橙仲唔應該同蝦、豬肉一齊食，因為兩者會結合難消化嘅物質，令人作嘔同肚屙。唔講你唔知，橙可以用嚟解酒，飲酒太多不妨食番個橙。
有果王之稱嘅榴槤，除咗濃烈嘅氣味好吸引人之外，原來亦有意想不到嘅治療功效，體質虛寒嘅人、產後經常出虛汗、或者屬寒性經痛嘅婦女最適合食用；但係有皮膚病、糖尿病、腎病、高血壓同心臟病患者就少食為妙。榴槤迷如果唔覺意食多咗，就可以食番幾個果后山竹化解。係咪覺得我醫神無介紹錯呢，其實大家不妨上去呢個網頁 http://www.fooddb.com.hk/home.php#睇一睇。
blog主：醫神