三個三十出頭大男人，話就話喺電台節目《新香蕉俱樂部》幫人解決感情煩惱，實則鬧爆無知少女寸盡少男情懷。相約試車，把口繼續唔收，Bob（林盛斌）：「諗住生咗個女換部7人車，點知成年得兩次載超過五個人。」Ben（杜浚斌）：「同攝影師講聲，呢條肥仔揸車好渣㗎。」Ricky（范振鋒）：「部車OK，不過要包埋個司機。」到底，呢架ToyotaAlphard350命運如何呢？
文：嘴嚼爺
攝：陳陶鈞
「一人少句吖唔該！」
「架架車都畀個朵佢㗎？」Bob見到車牌位黐住「陸上行宮」四隻字，即問車行PR姐姐。Ben又玩嘢：「係咪全部都要4個字㗎？考慮吓用『一人少句』呢四個字吖，有無聽過《一人少句》？我哋首新歌，下個月出碟呀，買唔買？」搞到PR姐姐笑嘻嘻口啞啞。講番車吖唔該，Bob話：「之前揸架懶係跑車嘅Supra，見老婆大肚所以換架七人車，諗住家庭Feel啲，點知成年先得兩次載超過五個人。」
Ben話：「我揸日產Tida，不過買之前無做功課，買咗一年唔夠就轉款，吹脹！」Ricky就話：「我都揸開七人車，成日載屋企人，講鍾意就好雜，寶馬Benz法拉利樣樣都覺得靚。」
Stop，家陣試ToyotaAlphard350呀，又Supra又寶馬法拉利……畀面試車啦，Ben先兜一轉：「坐嗰個好舒服，咁大架車原來好好軚喎，頭先掉頭諗住點都要兩手軚先U得晒，點知一手搞掂。」到阿Bob上車，佢居然搵唔到泊車掣，又俾Ben寸：「佢搵唔到個Brake喎，嗱，係咪呀，我無呃你啦，哈哈，你驚唔驚呀𠵱家？」Bob試車報告：「快，好力，裝備豪華，前後冷氣加飛機座椅，舒服到暈，做開工車啱晒。」到Ricky：「幾好呀，咁大架車嚟講，轉彎算幾好，加減波反應快。」
「想要鄭大班架Dreamcar！」
例牌菜，問佢哋有乜Dreamcar，Ricky繼續正經：「真係無乜，好好睇睇就得，跑車我麻麻。」估唔到Bob最辣：「戰神啦，新嗰架唔好，舊嗰架R34有霸氣啲。你可以寫埋，鍾意乜車睇到一個人性格㗎。」戰神連消帶打反擊：「Ben鍾意埋嗰啲就似佢性格啦，霸霸道道。」原來Ben鍾意Hummer同平治G-Class，「太貴喇，所以咪Dream囉。」仲有古講，「鄭大班有架舊款嘅，嗰陣我啱啱喺商台做，搵到少少錢啦，就成日撩大班，『你都無乜用㗎啦，賣啦。』佢答：『賣畀你喇，平價啦。』『咁幾多呀？』嘩！開價四十萬！我話黐線，十萬左右就話買得起啫。」
「無自食其力呢個Concept！」
《新香蕉俱樂部》聽眾最鍾意聽佢哋鬧人寸人，「我哋三個都係同一代人，其實已經係好鬼幸福嘅一代，有書讀又唔使細細個出去搵食。𠵱家啲𡃁仔係無自食其力呢個Concept，點解唔做呀？辛苦囉、俾人鬧囉、受唔到氣囉。」Ricky：「又唔係全部𡃁仔𡃁妹都衰嘅，不過可能好嗰啲少打上嚟啦……」Bob殿後：「好多𡃁仔𡃁妹搞唔清楚係唔係鍾意對方，就亂咁發生性行為，最後大埋肚。問佢哋點解唔用套？『無呀，佢話唔想。』咁可以拒絕㗎？『唔想佢唔開心。』聽到真係超嬲。」
鬧開鬧埋，咁對馬路事有何不滿？「油費啦，加快減慢，一間加間間跟住加。仲有，九龍有個商場好大整蠱，個停車場喺十幾樓，我用廿分鐘先上到去呀大佬。」Ricky率先發炮。「車速限制啦，點解三號幹線有段咁長嘅路行八十？怪㗎真係。」
Bob同Ben一樣咁嬲：「太多快相喇，有好多位都唔合理。」你戰神啫！「咁無載老婆同個女嗰陣，我都會揸快少少，不過我暫時俾人扣咗三分咋喎。啲職業司機就真係要話吓嘞，有啲的士司機，有客嗰時好快，癲咗咁啄住你，無客就慢慢行，癲咗咁阻住你，真係好得人驚。」連珠炮發講中晒駕車者心聲，我開始明白，點解我上司阿靚仔編輯，晚晚都要開收音機，聽完佢哋鬧人先捨得瞓。
ToyotaAlphard350規格
引擎：3,456ccV6雙VVT-i
馬力：274ps/6,200rpm
扭力：34.6kgm/4,700rpm
傳動：六前速加減波，前置引擎、前輪驅動
車價︰$561,000
查詢：皇冠汽車（28661020）
