小妹啱啱收到網友Annie嘅email，佢話早幾日喺街巿買咗一條甩色毒魚，嚇到佢唔敢食。
Annie話，佢喺今個星期一晚上7點去石硤尾街巿買餸，行到一間魚檔見到啲燕星斑幾靚，肉身鮮紅賣相好新鮮，咪買咗一條返屋企煮嚟食。點知喺洗碗盤清洗條魚嗰陣，越洗越多紅色，搞到成隻手變紅，原來條魚甩晒色。
小妹收到封email，即刻打電話畀家庭醫生關嘉美，問吓呢啲甩色魚洗亁淨咗食唔食得。關嘉美話千祈唔好食，呢啲魚應該係塗咗工業染料，好大機會係蘇丹紅，呢條燕星斑已經變咗一條毒斑，食咗後遺症真係可大可小，會傷害腸臟、肝臟，對孕婦嘅影響特別犀利，嚴重可以引致Cancer。
關嘉美鬧啲奸商為求做成生意，施展呢啲食物化妝術，吸引啲人買毒魚。消費者購買嗰陣真係好難分辨係咪染色魚，返到屋企清洗嗰陣發現甩色，千祈唔好洗走晒啲證據，要即刻向食環署投訴拎走啲魚去化驗，唔好放過呢啲黑心商人。
電郵：mailto:[email protected]
逢周六、周日刊出