【本報訊】智能手機大戰趨於白熱化，蘋果iPhone3G強勢襲港後，Google又將推Gphone；但智能手機功能多多，消費者摸也摸不清。手機生產商諾基亞有見及此，最近在本港首創貼身上門顧問服務，派員到客戶寓所教導如何玩盡手機功能。有學者則認為上門顧問服務夠創意，但最重要是手機本身設計容易使用。 記者：蔡朗清
使用智能手機年多的26歲行政人員Leo，也未能摸清手機的功能，使用Wi-Fi上網變GPRS上網，收費倍增。最近他改用諾基亞E66智能手機，知悉諾基亞有上門顧問服務，馬上預約，「上嚟屋企教，收180蚊，唔使自己慢慢摸咁煩。顧問上嚟45分鐘，即刻學曉點用Wi-Fi同GPS（衞星導航），以前搞成一年都未搞得掂。」
服務收費180元
諾基亞香港及澳門區市場營運總經理林國誠表示，早前已推出免費手機培訓課程，今次再進一步提供上門顧問服務（收費180元），派員上門教客戶應用手機及協助新機個人化設定，「一星期七日早上10點到凌晨12點（按：意指凌晨零時）。」
林國誠強調，其中一個重要服務示範手機與電腦同步處理，協助客戶將隨手機附送的軟件安裝在電腦上，將手機資料輸入電腦，「呢個軟件好好用，將相片、電話簿嘅資料輕易傳入電腦，或傳返去手機，跌咗部手機都唔驚冇晒資料，但係好多客戶都唔識用呢個功能。」他續稱，最多客戶求教是如何設定、使用手機Wi-Fi及衞星導航，「真係唔少客唔識用Wi-Fi同衞星導航，我哋唔明講到明，仲歡迎成家人一齊嚟聽都冇問題。」
對於諾基亞推出上門顧問服務，蘋果亞太產品市場總監李國權表示，蘋果iPhone3G設計簡單易學易用，若有需要，隨時可致電熱線查詢或上蘋果網站瀏覽，有片段示範使用手機，毋須上門顧問服務，「最新收到一個Case，係印度一個客戶，將iPhone畀咗佢60幾歲媽媽用，話咁快就玩熟。」
港大電機電子工程學副教授張星煒表示，現今智能手機功能趨複雜，上門顧問算是不錯噱頭，「但最重要係部手機設計易學易用，如果太過複雜，只係一兩次上門教你用都未必吸收到。」
上門顧問服務
服務時間：周一至日上午10時至凌晨零時（時間地點任擇）
服務範圍：設定及使用手機Wi-Fi功能，安裝及設定NokiaMaps，幫助備份電話、日程表、相片及音樂，示範手機與電腦同步處理等
預約熱線：21366338
網上預約： http://www.nokia.com.hk/consulting
收費：180元（顧問服務最長兩小時）
資料來源：諾基亞