耳目一新嘅立法會下個禮拜三召開第一次會議，焦點無可避免會集中喺一眾新丁或者重返議會嘅翻丁身上。例如陳克勤會唔會嘗試以英文發言一雪前恥，例如毓民會唔會將台灣立委反枱掃咪嘅豪放作風輸入香港議事堂，又例如超級新人王陳淑莊同隔籬鄰舍葉劉淑儀能否守望相助相敬如賓…總言之一諗起就好鬼期待。
早排幾大政黨抽籤分配座位，之後各黨再內部自行編排邊個坐邊度。以票后姿態當選嘅新人王Tanya陳淑莊就唔識死，坐正葉劉隔籬都嬉皮笑臉，話以後可以傾多啲偈熟絡吓兼互相照顧。Tanya曾經喺話劇《東宮西宮》裏面扮過葉劉分身，咁抵死吖嗱！你唔驚葉劉喺議會上公報私仇咩？而且兩個女人一個牙尖嘴利、一個寸寸貢嘴藐藐，到時睇佢哋鬥嘴，應該好睇過佩林同拜登電視辯論，但坐喺葉劉另一邊嘅寶哥哥唔知會唔會頂唔順呢？
盼成為攝記捕捉對象
Tanya叫大家唔使擔心，OK喎，仲好歡迎有個咁有議會經驗嘅人物做鄰居㖭。Tanya有個期盼，認為葉劉必定成為攝影記者捕捉對象，坐佢隔籬好處係，鏡頭會唔覺意影埋自己，更多曝光機會。新人即係新人，Tanya唔知道，佢同葉劉都係背住記者席坐，見報率點都差少少，被記者篤背脊就有佢份。
再講社民連毓民、長毛同大嚿三大惡人，毓民抽到條好籤，社民連係第一個優先揀位嘅政黨。本來佢哋打算三個人一條心，一字排開坐正最接近主席位嗰一排位度，將嗰排位打造成立法會正宗三煞位，點知阿Cyd何秀蘭做好心提醒毓民，話坐第一排位離場好麻煩，冇得走側門，要沿大樓梯出正門。結果三大惡人縮番條槓，向後移動一排，進可攻退可守咁話，留番前排畀公民黨坐。
如此一來，作為翻丁嘅阿Cyd，將會同卿姐暨三大惡人做鄰居，可以想像，嗰排位將會係全個立法會噪音分貝最高、口水花最氾濫嘅重災區。形象比較柔性嘅阿Cyd話自己泰山崩於前而色不變，面對火爆扯火嘅惡煞，佢實行以柔制剛，希望以一己之力化戾氣為祥和。
保皇黨嗰邊冇乜好講，只係需要補充一句。鼠王芬坐喺工聯會同民建聯嘅前面，完全首尾呼應咗左派嘅配票工程。鼠王芬有今日，全賴蛇宴黨背後發功鼎力過票。家陣坐埋一堆，謝票都方便啲。
mailto:[email protected]