噚日有報道指,話平機會打算畀資深員工放最長可達一年嘅「安息假」(sabbaticalleave)。
不過,平機會主席鄧爾邦即時出嚟否認,話佢都係睇報紙先知有呢件事,問番原來呢個只係平機會內有員工提出嘅建議,已經被否決咗,亦冇打算提升到大會去討論。
主席唔覺壓力大
佢又講笑話,自己做主席都唔覺好大壓力,冇需要放一年假嚟減壓,相信其他員工都唔使喎。八方知道一啲外資公司有安息假,畀員工請一年半載假去進修之類,其間可能停薪或者有啲人工。不過平機會係使公帑嘅機構,唔同私人公司,若果實行安息假,實被人鬧係大花筒。
鄧爾邦噚日出嚟開記招,其實係公佈佢哋嘅一個調查,調查結果話受傳媒影響,公眾對兩性形象嘅睇法都已經預設框架,例如認為女人應該溫柔啲。
個調查又畀咗啲雜誌封面、纖體廣告同與性有關嘅報道,要受訪者睇吓接唔接受到,結果大部份受訪者都話個人唔係好接受咁暴露,但卻認為社會大部份人都可以接受。做啲咁嘅調查,唔怪得鄧爾邦話同事唔需要放長假減壓啦。