小藍之前同AVConsultant嘅女顧問瑩瑩傾開，知道𠵱家越嚟越多女仔玩影音。早幾日去銅鑼灣時代廣場搵專賣日本潮流產品JCShop嘅老友Alan吹吓水，佢都話唔單止多咗女仔玩，年齡仲細到十幾廿歲㖭。佢哋仲專登喺日本引入咗一批限量版嘅HelloKittyAV影音系列，12套即刻賣清，啱啱先再入多一批。
全套售4,608元
Alan話，呢批影音系列，除咗一部KittyDVD機外，仲有Sanrio同Swarovski合作嘅吉蒂貓水晶影音，包括兩個大、細耳筒、USB同滑鼠，全部嵌滿晒啲水晶，連DVD機全套買要4,608蚊，唔少顧客係啲男仔買嚟送畀女朋友。
小藍見到啲機同配件又幾鬼吸引啲女仔，好似部粉紅色嘅DVD機咁，直立式外殼，印有大大個嘅KittyLogo，加埋吸入式入碟，夠潮夠搶眼。再襯埋水晶耳筒，啲囡囡即刻要投降啦。部DVD雖然無支援高清格式嘅HDMI端子，但都有次一級嘅色差同光纖線插頭，咁都算睇得又玩得，匿埋間房駁埋電腦睇碟都OK啦。
逢周五刊出