周柏豪不用工作時會拿着相機四處影，最近他把自己的作品輯錄成書，別以為影相是周柏豪一時玩意，其實他培養這個嗜好很久，更讓他找到創作靈感。周柏豪愛影家人，透過鏡頭，他更發現父母老了，令他深明珍惜眼前人的道理。
樂壇新人周柏豪工作不絕，出碟、出書、行騷樣樣有份，他事事都爭取參與，連新碟《Continue》部份歌曲，由作曲、填詞和編曲都落手落腳做，其中《最後的三分十六秒》更一手包辦所有工作。
四圍獵影坐唔定
這麼多諗頭，全靠平時拍照刺激頭腦，周柏豪日前說：「我經常同朋友周圍去影靚相，南生圍、將軍澳工業邨、舊機場等嘅地方我都有去影，每次都畀到好多靈感我，我就好似其他攝影發燒友咁，放假有時間就去影。影相可以幫我諗嘢，個人安靜啲，然後就會發現周圍嘢畀好多靈感自己。」
受母親感染，柏豪小時候已經愛上攝影，現在他已收集了十多部相機，有玩樂性質的，也有專業的器材，他說：「有日執屋，俾我搵到媽咪一部好舊嘅菲林相機，十幾廿年前嘅，我𠵱家拎番嚟用，我覺得喺相機嘅viewfinder睇嘅嘢會好靚。我最鍾意影屋企人，但發現爹哋媽咪隻手唔同咗，老咗好多，好多紋，我平時唔覺，要集中精神影相先發現，所以我學識珍惜屋企人。我覺得影相好多好處，搞到我好深癮，好沉迷。」
曾囂張痛改前非
初入行做模特兒的周柏豪，有少許知名度不自覺態度囂張，他說：「17歲出街有人識，搵自己簽名就覺得不可一世，對朋友屋企人嘅態度都好衰。人哋對我嘅批評唔理，後尾我生到全臉暗瘡，搞到自信心冇晒，唔出街，個人跌到落谷底，但啲朋友都冇離開我，嗰時先發現以前對朋友好差，知道以後要控制情緒。」
採訪：王連連 攝影：陳慧安
髮型：CliffChanofHairCorner
化妝：KrisWong
場地提供：AtCornerJapaneseRestaurant
