財務總管（CFO）R幾年前已經同左丁山講：「世界唔同晒，記者惡晒。我哋請人或者上司評估我自己，都要定下一套新嘅技巧技能標準，唔淨止睇會計師牌、財務管理經驗、過往打工表現，仲要睇埋口才、辯才，面對群眾（即係記者群）嘅說話能力。我發覺好難搵到適合人選，包括我自己在內。」左丁山當時為之失笑，對財務R講：「我識得嘅銀行家、會計師、工程師，好少能夠講話時口若懸河，滔滔不絕嘅。立法會議員企起身，冇貓紙，都一樣唔識講嘢啫，不如你請個做慣公關嘅人嚟做財務管理！」
香港人嘅演講能力，不如大陸人、台灣人，相信係中小學校不鼓勵學生發言、參加討論嘅結果，自小唔慣企起身發言，到出嚟社會做事，一樣唔掂。最近有報紙評論任志剛總裁說話得體穩重，香港冇咗佢唔得。任總嘅口才確實係好，與曾俊華司長面對記者說話嘅情況比對下，任總真係贏晒。但不可不知，任總面對記者逾二十年，經驗豐富到極，賓架與一般官員好難同佢比，但如果因為佢講說話能力高，香港財金系統就冇咗任總唔得，啲傳媒評論員嘅要求都好低噃。
左丁山讀書時聽過著名經濟學家蔣碩傑演講，聽到一嚿雲。蔣教授辭不達意，英語唔算標準，但我哋讀佢嘅英文學術論文，就驚為天人，知道蔣教授係國際一級經濟學家。後來佢返咗台灣，影響力好大，如果我哋單係聽其英文演講就批評佢冇大將之風，一定錯得離譜。口才係好重要，好多高級行政人員要搵專家惡補，但口才唔係唯一最重要嘅做人做事條件。近日睇到一篇評論話東亞銀行招待記者，副行政總裁彭玉榮表現「唔及格」，毫無大將之風喎。其實左丁山都有睇到記者招待會，賓架彭整體表現中規中矩，不過不失，可以鎮得住，而佢咁多年來，都唔會係記者會嘅主角，呢次只因李國寶主席不在港，先至由佢發言啫。識得賓架彭嘅，都知道佢學識淵博，常識豐富，係一位通識教育人辦（佢自己就話此乃崇基學院四年通識教育之功），如果報紙上任何一位財經評論員願意同賓架彭鬥常識、鬥銀行知識嘅話，相信「壹仔」楊社長一定識得點樣落注！