楊千嬅前晚與林海峰、農夫及EricKowk舉行音樂會，千嬅大玩雜技，不過表演5分鐘後，已上氣不接下氣，幸博得台下觀眾不少掌聲，她又讓林海峰等人匿在裙底為音樂會作結，認真大犧牲。另外，千嬅又為情挑丁子高解畫，她自言是個烈女，不想做風月版女主角。
商台前晚主辦的拉闊音樂會請來楊千嬅、林海峰、農夫及EricKowk四個不同單位合作，在亞洲國際博覽館演出。在其中一環節上千嬅身穿鮮紅色改裝露膊裝，儼如奧運選手一樣，她出場即大顯身手，看得觀眾站立拍掌。
當眾除腰封
千嬅不只勁歌熱舞，而且更使出360度旋轉、前後空翻及打側手翻等高難度動作，不過全程由舞蹈藝員托腰協助下完成，當她狂跳5分鐘後已大汗叠細汗，而且不停在喘氣，在台上邊唞大氣邊問觀眾說：「收唔收貨呀？開唔開心呀？我喺呢二、三十年裏面都未試過跳勁舞。」接着她更即場脫下腰封，繼續喘着氣唱《少女的祈禱》。
前晚千嬅共換了三套衫，其中一襲露背黃色低胸晚裝十分性感，不過一向保守的千嬅卻在晚裝內加穿黑色貼身內衣，她笑說：「啲時間好趕，我連耳塞都跌晒，身上戴咗啲假嘢都跌埋。」在音樂會尾聲時，農夫、林海峰及EricKwok又化身四大頑童捐入千嬅裙底，認真搞笑。事後千嬅接受訪問時說：「我條裙有打底唔會走光，不過跳勁舞好辛苦，跳之前我食咗兩劑中藥補氣。」
「一向係烈女」
另外，問到有指她情挑丁子高，更到男方家中密會，千嬅笑說：「咁型呀，用情挑呀，我一向係烈女，啲文寫到好似風月版咁，其實係四個人去丁子高屋企，之後再換車去唱K，我架車經過都見到有狗仔隊，我仲以為影黎生（黎明）㖭，後來大家賭邊間周刊，我輸咗一餐飯呀，我都慣咗，咪當自己仲有新聞價值。」
千嬅自言出新碟所以不惜一切要宣傳，今次是自己放料的，早知不用老闆黎明登廣告。記者提議叫丁子高在家中窗前貼滿她的玉照才有宣傳效果，千嬅卻笑說不如她拿着自己的海報站在黎明家外宣傳，她這樣賣力相信黎明不會介意。
採訪：馬建華
攝影：陳順禎