謝婷婷殺入模特兒界，發展順利，她前晚又和楊愛謹（Miki）及熊黛林等亮相公益活動，開心由「霆鋒個妹」成為「謝婷婷」。至於被傳和已婚永安太子爺郭永淳同車夜蒲的Miki，則例牌否認緋聞，但表示之前不知男方已婚，以後會避忌。
謝婷婷、熊黛林、AnaR.、楊愛謹及鄭希怡（Yumiko）等，前晚在時代廣場出席「10月關注乳癌活動」，為配合乳癌宣傳的「粉紅絲帶」標誌，眾人大都穿上粉紅色衣衫，只得Yumiko全黑現身，顯得格格不入。
「我哋認識尚淺」
Miki去年被指與31歲已婚永安集團太子爺郭永淳（Edwin）暗中交往，早前兩人更被拍到出席鄭明明女兒婚宴後，相約中環夜蒲，並同車離開。她前晚如常否認說：「我睇報道先知男仔嘅家底咁豐厚，佢係阿田（側田）介紹，識咗兩年，朋友嚟啫。其實阿田都有去，係一個誤會，我之後有活動，佢車埋我啫。」
Miki又謂不知男方已婚，她說：「交朋友唔會諗佢有冇結咗婚，我哋認識尚淺。」但Miki表示會避忌，少跟Edwin見面，她說：「唔想影響到人哋囉，佢都唔係圈中人，我打畀佢講單報道，佢反應都驚訝。」
謝婷婷近期密密出動，她說：「多啲job，同慈善有關嘅唔收錢都得，以前我用『霆鋒個妹』，𠵱家用番個人嘅名義出嚟做，嗰意義唔同，更加有意思。」她的母親狄波拉本月底生日，她謙稱買不起名牌手袋送禮，自己又未夠廚藝，她說：「佢鍾意我寫賀卡，以前喺外國少陪佢，𠵱家陪媽咪多啲囉。」
熊黛林自摸驗胸
至於全場最性感的熊黛林則自爆貼足膠紙，絕無走光危機，問她可有做足防乳癌檢查？她說：「間中都會自己摸吓，我爹哋係醫生，佢都有講啲畀我聽，有啲（病者）要切咗一邊去，好慘。」有傳胸大患乳癌的機會也增加，她即說：「咁一定唔係我，我正常size，或者正常大少少啫。」
採訪：LawWaiMan
攝影：ChanChiLam
