古巨基噚日喺apm舉行「GuitarFever」簽唱會，吸引幾百名歌迷到場。杜德偉嘅模特兒女友Bibe同莊思敏擔任人肉結他，讓基仔在她們身上彈，場面香艷。基仔事後話有啲尷尬，同埋絕對唔敢掂落兩個女仔條腰度。
收Kelly嫁女餅
今日係陳慧琳（Kelly）結婚大日子，基仔話有收到Kelly送嘅嫁女餅，佢都好戥Kelly開心。有傳梁漢文（Edmond）12月會結婚，基仔話有打電話恭喜佢。當追問基仔幾時結婚，佢就強調自己好想結，但係未有對象，佢仲一邊講一邊緊張到流晒大汗㖭！
另外，Bibe噚日同莊思敏喺apm宣傳國慶活動，莊思敏話睇好一對孿生妹妹入行發展，佢話：「佢哋都高同瘦。」講到Angelababy、JaniceMan等唔係好高都發展得幾好，莊思敏即狂踩佢哋話：「嗰啲係𡃁界，係矮啲，係專門畀啲未發育嘅男仔market。」
同場嘅Bibe自稱20幾歲，問佢同杜德偉拍拖兩年有冇代溝？佢話：「冇，佢嘅心境仲好young，大幾多我冇計過。」提到她將來難免同杜德偉嘅舊愛周汶錡碰頭，Bibe話：「唔會尷尬，都唔怕比較，各有長處囉，佢都好好，catwalk好叻。」