鍾欣桐（阿嬌）自從年初嘅淫照事件後，暫時復出無期，日前台灣藝人楊繡惠喺節目《心花朵朵開》中爆料，話佢哋之前去拜白龍王，點知遇見阿嬌，佢話見到阿嬌由後門入去見白龍王，白龍王用蓮花喺佢頭度敲咗三下，之後用剪刀剪咗佢一小撮頭髮，跟住阿嬌就由其他師兄引領下去咗間密室，同其他人嘅儀式有啲唔同。
另外，阿嬌嘅好拍檔蔡卓妍（阿Sa）同合演新片《武俠梁祝》嘅吳尊日前接受商台節目訪問，訪問噚日播，阿Sa用普通話大讚吳尊：「外表不用說，很帥，他又很孝順，經常擔心爸爸會生病。」吳尊都好識做大讚阿Sa，佢話阿Sa係個親切、容易相處嘅人，不過平時就食好多嘢。阿Sa又話吳尊成日笑佢，而吳尊亦反駁話阿Sa成日笑佢嘅表情同廣東話。節目主持話佢哋好有金童玉女feel，阿Sa即抵死話吳尊係叔叔。
吳尊難忘搶屍戲
阿Sa仲自爆曾經被好朋友喺背後講壞話，問到佢識男友咪更加小心？阿Sa話：「拍拖好花時間，要互相了解，要睇清楚先喺一齊同結婚。」近日阿Sa因身體差而月經失調，佢坦言：「好擔心，怕生唔到仔。」主持即刻話狄波拉教人生仔好叻，阿Sa聞言就大叫：「拉姑救我呀！」《武》片即將上映，吳尊最難忘係結局搶屍戲，佢話：「現實中很少流淚，最後想到母親離世，眼淚就不由自主流下來。」阿Sa扮死屍都好辛苦，要閉氣之餘又要喊。