早飛2+5:喜伯年請客食烤「鴨」 - 畢傑

早飛2+5:喜伯年請客食烤「鴨」 - 畢傑

牛兄喺歐聯大注命中馬體會熱W,總算為〈早飛倉〉增加些少儲備。畢傑擂台手風順,但喺呢個專欄仲未回勇,今期決定買場幾有信心場次,不過注碼就縮少少,要周六蘇超喜伯年作客鴨巴甸不敗,撐硬「讓球主客和」的「客勝」。
畢傑一向玩擂台平均每月都有盈餘,唔知點解〈早飛2+5〉唔可以受惠長期處於旺勢。檢討我早前推介嘅西甲馬體會贏西維爾未能開W後,發覺呢班波真係幾重視歐聯,每逢歐聯前夕都會喺聯賽失分,大家不妨一齊記住呢個point。

鴨巴甸假波醜聞纏身

今期突然轉玩蘇超,原因係賽前收到鴨巴甸軍情唔掂。首先,鴨巴甸最近捲入打假波醜聞當中,前領隊柏達臣已經被調查。前教頭身有屎,現任領隊卡特活近期都唔好過,由於球隊聯賽3連敗,𠵱家排喺聯賽榜尾二,搞到球迷拉大隊要求卡特活快啲落台,呢位領隊壓力唔大至奇。
最慘嘅係鴨巴甸傷兵問題嚴重,守將干斯甸尼、主力中堅施維連、翼鋒占美史密夫全部受傷出唔到。今季7場聯賽入得嗰6球波,竟然有3球係由後衞梅古所得,反映前面嘅李爾米拿同戴倫麥基等射手冇個「弗」。
客軍喜伯年今季人腳唔差,陣容有皇家馬德里都想斟介嘅射手史提芬費查,而新加盟前鋒哥連尼殊已入3球,點計都好過鴨巴甸。喜伯年周六有守將班巴停賽復出,至於哥連尼殊、中場菲臘摩拉斯同伊恩梅利又傷癒可候命,就連領隊柏廸拿倫都話:「周六人腳係季初最齊最勁嘅。」喜伯年呢場波冇得輸,我貼佢哋坐和望贏。

博布力般頂得住曼聯

配腳揀咗英超賽事,博布力般流浪迎戰曼聯不敗。紅魔雖然啱啱有新兵貝碧托夫開齋兼梅開二度,不過朗尼同史高斯都唔出得,打完歐聯返嚟單W得嗰1.53倍,唔抵買。布力般近況好之外,近年主場對曼聯好多時都輸唔到,對上6戰就2勝3和1負;我博佢哋頂得住,2.3倍「主勝」好路。文:畢傑

〈早飛倉〉

主菜:星期六43喜伯年勝[+1](1.6)@700
混水摸魚過關:
星期六43鴨巴甸和(3.25)x
星期六51布力般流浪和(3.6)x
星期日62波圖(下)3x4@100
今日早餐價錢:-$1,100
上日賺蝕:+$600
早飛倉結餘:$93,515
規則:$100,000本錢,每日買早餐最多動用$5,000,最少$1,000,逢周二、五起身食早餐(見報)。

周末早飛超級重心

星期六19 利華古遜大(1.57)
利華古遜近期入波入到唔識停,連續4場聯賽開「大」梗要再追,新星希美斯6場入7球,今迎哈化柏林又係大手交易時候。

星期六62 國際米蘭勝[-1](1.68)
國米連輸兩口盤,但對AC及不來梅其實表現不差;客軍博洛尼亞日前頗強陣下出戰意大利盃,國米是時候益捧場客了。

星期日62 波圖(下)
士砵亭與波圖同樣出戰完歐聯,前者雖續於主場出戰有體力優勢,惟季初贏波場次僅對弱旅,遇強隊則全輸,難讓平/半。

難啃早餐

星期日50 雷恩勝[+1](1.67)
里昂今季作客入球數字大減,周中歐聯射入拜仁大門亦靠對手擺烏龍;雷恩主場4戰2勝2和不敗,有力出冷。