股神畢菲特透過旗下中美能源控股入股比亞廸（1211），市場早已預料比亞廸股價會大幅急升，但當日早上比亞廸股份要先停牌半日，市場無得好炒，於是先炒未有停牌的比亞廸電子（285），股價一度急升逾70%，在開市近40分鐘後，才忽然跟隨母公司停牌。
這次不同時間停牌事件，再次凸顯港交所（388）的停牌政策混亂。當日下午比亞廸復牌後，股價一開市即見16元的天價，其後徐徐下滑，跌至12元左右收市，至於比亞廸電子，升幅收窄至約兩成，當日高追兩隻股份，都要坐艇。
由於比亞廸是繼03年股神入股中石油（857）之後，另一家被看中的本港上市股份，有中石油其後急升的往績作參考，當然大把捧場客，雖然股神並無入股比亞廸電子，但係母子同系，稍有市場觸覺，都應該同步停牌復牌，以免市場混亂。
大摩認為過份拋售
比亞廸電子雖非今次入股主角，但仍然有一定討論價值。此股在大淡市中分拆上市，唔知係貨源歸邊定係乜嘢原因，其股價於掛牌後幾日內由約10元急升至15.50元，但炒得幾日便完全後繼無力，今年初見頂後反覆跌至上月最低1.72元，高位唔見咗近9成。
摩根士丹利在上月初曾發表報告，指比亞廸電子中期業績或令人失望，但同時認為該股已呈超賣，過去3個月跌幅已超越基本因素的憂慮，是被過份拋售，股價跌至今年修訂後市盈率及市賬率分別4.5倍及0.9倍，意味下半年純利並無增長，假設過於悲觀。大摩將集團目標價由10.70元下調至9.20元，現水平看來，仍然是天價。
歐陽風