10歲嗰年，對股神畢菲特嚟講，可以話係人生嘅轉捩點。當年佢有機會拜訪華爾街傳奇──有「華爾街先生」之稱、高盛高級合夥人溫伯格，仲同一個「食雪茄的男人」食飯。
就係呢個雪茄男，改變咗股神一生，令佢認識金錢嘅威力，從此立志發憤賺錢。
據股神本《雪球》自傳講，畢菲特10歲嗰年，老竇侯活帶佢去華爾街參觀紐交所，之後同一個交易所會員食飯，呢個男人鍾意食雪茄，仲係handmade嗰隻。食完飯，雪茄男梗要抽番啖雪茄，佢有專人幫手捲雪茄，仲有不同煙葉任佢揀。
就係呢種派頭，令少年畢菲特留下深刻印象，當時美國啱啱先喺全球大蕭條復原過嚟，但班華爾街老闆竟然已經咁有銀，食雪茄都有專人服侍，證明就算環境點唔好，股市仍然有賺錢機會。
「金錢使我獨立」
呢次華爾街之旅，啓發咗畢菲特嘅金錢觀念，「金錢使我獨立，讓我做自己喜歡做的事，為自己工作，毋須受人在旁指指點點，對我來說，每日能隨自己意思做事是很重要的。」
嗰餐飯之後，畢菲特去圖書館借咗《一千種賺到1000元的方法》，學到賺錢要實踐，同埋複式回報嘅威力。畢菲特35歲嗰年，賺到第一個100萬。
（第一集）