又《機戰》？仲要PS2？無錯！始終PS3同XB360喺日本仲未好強勢，加埋上次《OG外傳》賣得唔錯，正所謂一動不如一靜，相信死忠Fans唔會太介意。老實講，《機戰Z》睇得出明顯有做嘢，畫面、系統亦唔係求其敷衍坤人，結果識貨者紛紛出手，搞到抵玩行貨好快斷市，算係近期難得一見嘅逆市奇葩！
文：陳福榮
機迷科水有讚無彈
唔係想踩《機戰》系列，始終過咗《第4次》、《F》同《Alpha》呢三個高峯，佢俾人感覺真係好鬼「食之無味，棄之可惜」。
不過《機戰Z》由收錄作品、畫面設計以至系統變化等，都唔比之前《第3次Alpha》遜色，睇班米飯班主嘅網上留言，絕大部份都讚到飛起，唔怪得靚價行貨出咗無耐就斷貨，日版水貨仲激炒過五嚿，連特典DVD隨時索價$600大洋。但大家依然捨得畀錢，再次證明想賺班擁躉錢，畀心機就自然落叠。
貼近高清？咪講笑！
《機戰Z》系統同以往最顯著分野，就係小隊變成三人制，當中再衍生出直線陣、倒三角陣和橫排陣三種變化，大幅強化咗戰術運用。其中尤以直線陣嘅「儲勁武器三連發」最為強勁，假如以特定組合如「萬能俠三人組」或者「SeedD三角」使用光學系武器，唔單止攻擊力會提升，仲會出現特殊台詞㖭。
另外廠方今次亦大刀闊斧將好多畫面重新整過，雖然扯大FullScreen亦難免起狗牙，但大頭CutIn則清晰無比，現知有機友拎部PS3谷行1080p嚟嘆佢，畫質仲話有進一步提升㖭！
超重神Hit爆加盟
機戰迷每集最重要話題，都係有咩新作加入，同嗰班老不死高達仲係咪霸住啲位。好咯！Gundam全22套作品裏面淨出5套，見慣見熟嘅元祖、ZZ同W全部收工，得番SeedD係首次曝光。
新機體，《TheBigO》與《創聖Aquarion》等未必人人有興趣；對筆者呢種老鬼，雖然《超時空要塞》FadeOut，但亦有《超時空世紀》填補番呢個空缺。若論最爆炸性，就當然係收錄咗現今大熱嘅《超重神Gavion》！佢嘅坐鎮幾乎等同當年首度引入《勇者王》咁興奮。
機種：PS2
廠商：Banpresto/NGBI
類型：SRPG
人數：1人
價格：$398
