呢個世界一沉百踩，所以我求大俠主張低調，多個朋友好過多個敵人。國米教練摩連奴就相反，口臭、招積兼霸道，結果周三歐聯主場被雲達不來梅迫和1:1，成個伏落地，仲要畀過路人踩幾腳囉！
球迷柴台以示抗議
我求大俠前晚捱夜撐國米，諗住睇吓摩連奴究竟點樣改變意大利足球，結果我睇到嘅係典型意大利波。馬爾干13分鐘入波後，國米就龜縮玩反擊，結果61分鐘被對方比沙路入波，嘔番兩分出嚟。主場球迷首次將噓聲送畀摩連奴，作為對保守足球嘅抗議！
講番呢個比沙路，07年加盟車路士跟過摩連奴搵食，好彩對方開季一個月後辭職，如果唔係比沙路都好難有運行。前晚呢位秘魯前鋒亦搏晒老命，結果上半場一次中柱，下半場完場前補射斜出，差啲就可以剝摩連奴條褲，好好羞辱對方一番。
老細：專心教波啦
最出乎意料嘅係國米會長莫拉堤，周三亦將矛頭指向摩連奴。原來摩連奴日前喺記招話自己年薪1,400萬歐元（約1.5億港元），仲高過伊巴謙莫域300萬，仲得了？結果國米要發表聲明否認：「純粹笑話！」周三賽前會長莫拉堤就話：「呢種笑話唔好笑，專心教波啦！」
摩連奴俾老細、球迷喪鬧，最開心肯定係同市死敵AC嘅教練安察洛堤。肥安今年冇得打歐聯，季初表現又差，上仗打吡砌低國米，先有番啲面見人。今次摩連奴喺歐聯失威，變相為肥安臉上黐金，以後出街shopping，都可以大大方方啦！