馬會慶祝沙田馬場啓用三十年，大送禮物，九月二十八日，十月一日，十月五日都有酬贈馬迷嘅活動，好似九月二十八日咁，入場人士就得到一個「沙田馬場三十周年紀念鎖匙扣」，甚為精美，值得保存，最實惠嘅，係廂房內燒乳鴿每客（有兩隻）只售三十元。熟客要一早預訂。所謂熟客也者，就係接近風雨無間、次次到場嘅標準馬迷囉，左丁山係其中之一。呢類馬迷，馬會根據每季訂枱記錄搵出嚟，有晒根據。
不過呢啲禮物如果同贏大錢比較，濕碎到極。披圖梁人氣旺盛，好耐冇養馬咯，今季佢組織嘅「好時代團體」嚟咗一隻新馬，血統唔似好標青，擺喺告東尼度，名為「正本仁心」，喺九月二十八日出場，冇人睇得起。左丁山到咗第八場，特登到沙圈睇吓披圖有冇到場，只見佢與成班朋友到齊，但賠率有四五十倍，唔似有落飛噃。問披圖：「七號『正本仁心』有冇機會？」披圖話：「做馬主梗係話有機會嘅啦，七號拖三隻熱門四、五、十一號。」嘩，隻十一號「龍船旺」熱到一點六倍，蔡約翰加韋達，係信心標誌噃，左丁山一時思路不清，搵番十一號做膽，拖四、五、七，唉吔吔，幾隻馬一齊衝線，難分難解，「正本仁心」竟然爆大冷跑第一，五號第二，四號與十一號倒灶，另一隻大冷門一號「魄力之城」跑第三，結果連贏派三千，三重彩派十五萬五，四連環創空前紀錄，派五十四萬，獨贏派五百一十九元。左丁山幾乎眼前為之一黑，點解自己唔用七號食全餐呢？揼完心口之後，略為清醒，打電話問披圖：「你係唔係中正㗎？」披圖笑聲不絕，話所有全餐食到應，兼且買自己隻馬Win，收錢收到手軟，張支票有七位數字喎。此人今年行大運，居然旺到入馬場，新馬一出即勝，爆巨型冷門，千祈唔好同佢對賭！披圖順便要左丁山更正，佢位「正本會」拍檔係醫學博士梁永雄，唔係梁國雄。當年肥彭心臟有事入瑪麗醫院，梁博士係主診醫生之一。