隔牆有耳:謝偉俊改名叫PaulBaby - 李八方

隔牆有耳:謝偉俊改名叫PaulBaby - 李八方

由法律超人變身做旅遊業界立法會議員嘅謝偉俊,噚日以一身白馬王子造型現身國慶酒會,佢嘅另一半白姐姐就由頭到腳以黃色系列出場。八方見佢哋形影不離非常恩愛,感覺有啲似周啓邦先生夫人嘅翻版。

想女友出席宣誓儀式

班議員日前剛剛抽完籤編座位,謝偉俊抽中原本寶哥哥嘅10號位,白姐姐即刻改口叫男友做PaulBaby!阿Paul話其實最想坐9號,但就被金勞詹坐咗,金勞詹都好滿意,因為9點係百家樂最大點數喎。
八方問白姐姐會唔會出席下星期嘅立法會議員宣誓就職儀式,佢竟然話要睇時間同心情。不過PaulBaby就好希望白姐姐可以出席,因為覺得會非常莊嚴同值得紀念,係佢人生一個轉捩點,仲話邀請白姐姐嘅感覺就好似求婚一樣!
白姐姐又大發嬌嗔,投訴阿Paul成日拉埋佢讀書,早排就畀咗幾萬蚊去公開大學讀傳媒學,但返咗一個星期白姐姐就唔肯返,佢話因為覺得自己已經夠料教書,仲使乜再讀。阿Paul就即刻話白姐姐今日件衫可能印咗個「寸」字。八方見佢哋兩個不停喺度打情罵俏,實在頂唔順,借機鬆人。