全球金融海嘯唔知點收科，香港唔少人都瞓唔安食唔樂，嗌晒救命。但身為金融界代表嘅立法會議員「金勞詹」詹培忠，呢一刻就快活過神仙，皆因佢喺過去兩個月間，喺澳門賭場同賭船贏咗成1.5億，噚日佢影印低晒喺賭場贏番嚟嘅支票副本戰利品畀八方睇。八方㩒過計數機，無花無假，金勞詹確係喺兩個月間贏咗一筆普通人夠過世嘅彩金。
立法會未復會，金勞詹善用假期，8月初到𠵱家一共光顧咗20次澳門嘅美高梅金殿、永利同亞洲之星賭船，合共40個鐘嘅喪賭歷程，佢每次都集中賭百家樂，時間大約兩個鐘。埋單計數，贏咗17次，輸咗3次，淨贏億五，平均每個鐘頭贏到375萬，睇怕城中都冇邊個打工皇帝，搵錢速度拍得上佢。
每鋪最盡賭150萬
金勞詹向來直腸直肚，直認自己算係賭得好叻嘅賭仔，對於賭博更有12字真言，就係「贏谷、輸縮、心清、數熟、夠毒、知足」。唔好睇小呢幾粒字，當中對頭腦同心理質素嘅要求好高。佢話賭場有無限本錢、無限精神時間、唔會驚同唔受客觀因素影響咁多優點，所以佢每次只會一個人同莊家對賭，賭嘅時間唔會長，同埋以佢承受到嘅注碼下注，每個人承受到嘅注碼極限有唔同，阿詹每鋪最盡會賭到150萬。
六、七十年代開始已經投身金融業，金勞詹話嗰個年代已經成日喺收市後，同啲行家去打麻雀同玩十三張，間唔中都會過大海玩幾手。反而做咗議員之後，間唔中先去Vegas賭吓錢。真係迷上去澳門係近幾年賭權開放後，因為啲外資興建嘅賭場服務好，喺啲外資賭場贏到錢更加帶畀佢打低鬼佬嘅感覺，「佢哋都蝦得我哋中國人多。」不過，佢極少幫襯燊哥旗下嘅澳博，認為澳博服務唔好喎。
賭得咁狼，但係金勞詹老虎都唔認自己爛賭，佢從來唔當賭錢係耍樂，因為賭錢係錢博錢。其實佢自己對賭錢都有幾個規條，叫人最好就唔好賭，要賭都要學精啲，去到賭場識控制自己同知自己做緊乜嘢，最後就係唔可以因為賭錢累及其他人。八方都認同金勞詹講法，佢能夠贏咁多錢確係一個奇迹，各位《蘋果》讀者當聽一單奇人奇事，千祈唔好學佢喪賭。
mailto:[email protected]
金勞詹：跌到萬七點要入貨
【小八方】賭場得意，喺全球金融危機之下，金勞詹老本行嘅股票投資一樣揩嘢，佢自己都話冇損手就呃你。不過，向來牙擦嘅佢話，已經默默趁低吸納，仲提醒有資本嘅投資者，萬一恒指跌到萬七點，記緊要入貨喎。
鍾情資源股消費股
八方呢等小投資者擔驚受怕之際，喺金融界浸淫咗大半世人嘅金勞詹以經歷過大起大落、見慣股市起跌嘅口脗話，恒生指數幾多點唔代表乜嘢，有人賺錢時有人蝕，社會好時你又未必好，社會衰時你又唔一定衰喎。佢又袋錢入八方袋，分享嘅經驗係人人賺到哈哈笑時，你要準備走人；相反人人蝕到呱呱叫時，你就要起勢入市，佢強調投資嘅嘢講求分析力，戇居就與人無尤。八方聽到都唔知點反應。
講咁多，呢個時勢投資乜嘢股票先搵到食，金牌莊家就話對一啲成日要供股嘅股票，一向敬而遠之，佢自己就鍾情好似煤礦呢啲資源股，同埋電訊等等消費股，道理好簡單，因為人人都要用。不過，一提起銀行嘅衍生投資工具，累到班持有雷曼迷你債券嘅投資者，佢就把幾火，鬧到政府同金管局體無完膚，仲話已經準備下星期立法會復會後，提出成立專責委員會追究責任。