樂活南丫島

香港235個海島之中，第三大的南丫島的確很獨特，它不是甚麼政府重點發展的旅遊景點，更不是交通便利設施完善的安居地，但這卻又正正是它獨特的源頭。樸素簡單的小島生活，沒有超市、沒有連鎖快餐，島上約8千名居民的生活，平淡得不可以再平淡，近年流行的樂活生活，其實南丫島人早已一直樂活其中。

記者：許維雅
攝影：梁細權

豆腐花阿婆（居住42年）

兩位現年70幾歲的劉生劉太，由1966年從鄉下跑到香港投靠堂兄，就一直沒有離開過南丫島。42年來生活極簡單，頭幾年耕田，到現在每日風雨不改賣了30幾年豆腐花，榕樹灣阿婆豆腐花無人不識。寄情於此，並非賣豆腐花帶來大富大貴的生活，一間石屋、一個竹棚檔口相伴40年，「以前周圍都係樹同草，邊有咁多屋，路都無呀，仲記得試過每家人要捐$50出來整路。𠵱家多人入來玩，有政府整路，又起多好多屋，唔同晒喇。」有一仔一女三個孫的劉婆婆，阿仔一家住南丫島，阿女搬出香港，仔大女大卻堅持留在島上、每日7點起床煮豆腐花，「唔做仲悶仲辛苦！試過出香港住，又嘈又逼。都係呢度啲街坊好，周圍同人傾吓又一日。南丫島空氣好，住得阿婆舒服，有嘢買，食得阿婆飽飽，阿婆無乜要求，假日有人來玩同我傾吓偈就好開心喇。」

■親製豆腐花多年，製具都十分簡單，隔豆渣木架也是她自製。

■拍照時要求兩人親熱啲，婆婆即刻挽實老公哈哈笑。

老外街坊Bob（居住14年）&JimOrr（居住7年）

這個廣為人知的老外勝地，島上酒吧、芝士店、書店、賣酒士多等都像專為他們而設。Bob和Jim都在港島工作，每日放工總愛在酒吧鬆一鬆，「據我們統計，這裏有來自43個不同國家的外國人，地方細卻因而更親近，放工後飲吓酒交流吓才返家。我們常說笑，由碼頭散步返家，本來5分鐘的路程必定會變了30分鐘，因為沿途都總會撞到好多朋友說幾句。」談到完美小島唯一的缺陷，Bob打趣：「取消星期日的小輪。」怕遊人湧入。起初搭訕，他們的反應是：「No！請不要宣傳這裏，夠喇，唔好引咁多人來呀！」

■Bob（左）、Jim（右）同中間的Fountainhead酒吧肥仔老闆老友鬼鬼。

原居民新一代Kenny（居住31年）

土生土長的原居民新一代，爺爺爸爸是水上人，Kenny由於在港島工作須要輪班，現有兩頭住家，但一星期仍有四日返南丫島，「太耐唔返會唔慣，細個一齊通山跑、玩水、偷番薯的朋友全部喺度，現在仍會約埋出酒吧飲吓酒，邊個屋企有BBQ就叫埋過去一齊玩，這裏最有感情就係人。過節過年、天后誕就最開心，個個南丫島大的都返晒來，有人燒炮仗放煙花，熱鬧如一家人的情況喺市區一定搵唔到。」

■Kenny說若女兒到小學階段，無奈會留更多時間在香港。

■Kenny曾就讀的南丫北段公立小學，「以前可以着拖鞋返學。」

媽咪組：小朋友要去沙灘！

同樣在南丫島住了年半的法國人Laurence同香港人May都係為了個女而搬入：「空間、綠化環境、海灘都係給小朋友最適合的成長環境，小朋友可以經常在戶外接觸世界各地不同的小朋友，心智發展會更成熟。」住了7年中國的Laurence知道自己大肚，同老公決定搬來香港，「我老公首次踏入南丫島就覺得別無他選。在這裏，你會覺得每日都是假期。要搭船麻煩？我老公話每日的工作壓力就靠這30分鐘船程cooldown。」

■Laurence同女兒一齊學中文，希望與本地人溝通更多。

■May經常帶女兒去沙灘。