香港市民近期俾毒奶、金融海嘯搞到人心惶惶，一有乜風吹草動，大家都好大反應。𠵱家唔只話東亞等銀行俾人散發謠言，搞到早排擠提，連中環著名大牌檔蘭芳園都差啲釀成「擠奶」事件。此擠奶不同彼擠奶，台灣形容女明星影相時刻意夾出胸前一條深溝為擠奶，呢度講嘅係擠飲奶茶啫。
熟客致電旅發局投訴
噚日國慶日，有人好緊張咁向八方報料，話發現位於中環結志街、以港式絲襪奶茶聞名嘅大牌檔蘭芳園可能不保，仲話目擊幾個工人已經拆緊個招牌，擔心係特區政府摧毀香港人集體回憶、文化遺產嘅又一惡行。八方本住求真精神，即刻落中環了解情況，果然真係見到蘭芳園好有特色嘅牌檔拆緊招牌，分店內仲擠滿唔少專登嚟飲奶茶嘅市民，盛況差啲就及得上上星期嘅東亞銀行。
八方即時搵嚟蘭芳園太子爺林俊業問個究竟。原來唔只八方聽到呢個消息，好多人都以為蘭芳園結束牌檔生意。林生話，因為早排颱風襲港，老店個招牌同個檔口都有少少破爛，為咗令顧客食得安心，諗住花費20幾萬將個檔維修一吓。工人噚日開始將檔口拆件運去元朗擺住先，大約兩星期之後就可以運返嚟還原個檔口，個招牌亦一啲事都冇。
點知工人一開工，好多市民就以為喺政府派人嚟搞破壞；即使噚日係公眾假期，傳聞好快已經傳遍中環，搞到「擠奶」。林生雖然不停向顧客解釋，又貼埋張告示出嚟，叫顧客暫時入去分店幫襯，仲強調老店冇事，但班熟客梗係唔信，仲打電話去旅遊發展局投訴，話政府保護文化遺產不力，搞到旅發局都搵蘭芳園老闆問話，講到佢哋口水都亁埋。
蘭芳園由1952年開業至今，好多名人都係熟客，好似周潤發、溫拿五虎都好鍾意坐喺大牌檔嘆杯奶茶；泰國白龍王、由高官變成政論家嘅王永平都係捧場客。之前仲有傳米芝蓮派人到蘭芳園，想話畀佢哋知入選，要求拍攝，但創辦人林木河唔滿意米芝蓮職員態度而謝絕採訪。
今次喺毒奶恐懼中，市民仍然嚟擠奶，可見港人幾咁愛惜香港嘅本土文化。事件亦反映，政府之前陰陰濕濕咁拆天星、拆皇后，搞到市民已經冇晒信心。
mailto:[email protected]