雖然華府救市就快成事，但金融海嘯已蔓延到歐洲，大行同基金大舉沽貨應急，加上本港又加息，個別大公司又有不利消息，恒指遂又出現插水式下跌，18000點大關再次失守，最低17796，大跌886點，尾段略有反彈，但收市仍跌801點，報17880，10月期指齊頭收18000，跌646點，高水120點。
加息拖累地產股
大行沽貨，沽到停唔到手，多隻大價股都成為開刀對象。滙控（005）加按息半厘，觸發地產股陣營大崩圍，長實（001）、新地（016）同恒地（012）分別大跌6.9%、5.1%同4.1%；新世界發展（017）更被風眼刮到正，低收8.23元，急挫13.2%。
大公司禍不單行，中國移動（941）受政策傾斜影響，前景睇淡，跌勢未止，低收75元，跌2.80元，平保（2318）持有富通股權，好大機會要進行大撇賬，股價繼續大幅滑落，低收42.50元，連續兩日都大跌10%，相信短期內仍會受壓。至於內銀股，則繼續受淨息差收窄壓力困擾，大幅滑落，交行（3328）、建行（939）同招行（3968）都跌逾6%，餘下3行亦跌逾4%。
不過對好友來說，有一個現象，可以話有少少安慰，就係大市跌成800點，上升正股仍超過200隻，其中大部份係股仔。事實上，好多股仔都跌到殘晒，唔少自己友已密密收集，等機會再大幹一番。家吓股價一毫幾仙、有業績支持嘅股仔好多，話唔定一年半載後會升幾個開。
講番新世界，5個月前股價仲係21元，噚日已跌到8.20元，跌幅超過61%；同去年11月中嘅高位31元比較，更大跌73%，現時股價已返回3年前水平，雖然跌勢未止，但已可國留意，若落到7.50元水平便可趁低分段吸納，博中線反彈，目標重上10元。
股價大折讓54%
新世界跌得殘，買佢有理由。07年底，新世界每股賬面資產淨值18元，現時股價大折讓54%；08年度（6月年結）的上半年，盈利56.4億元，大升3.1倍，每股盈利1.52元，其中有約39億元係重估盈利及特殊項目收益，估計全年賺72億元，每股盈利1.95元，預測PE只係4.2倍，實力股跌得急，亦會彈得急。
郭兆誠