東京遊戲展要等到10月9日，不過唔代表Games界無搞作，日前微軟舉行一個新作試玩會，率先試玩新大作。《Fallout3》係一款新派RPG槍戰遊戲，有升級及特別射擊系統；而《Fable2》就將華麗魔法世界展現玩家眼前，絕對係10月期待作。
記者：許福合
華盛頓 核戰之後
《Fallout3》前作距離至今已經有10年，遊戲除保留槍戰遊戲的同時，亦加入好多新元素。背景少有地將美國描寫作成一片廢墟，受到核戰毀滅性打擊後，倖存的人從避難所走出來探索原本熟悉的「新世界」。遊戲主場景是美國華盛頓區，但地圖大得驚人，當處身戶外時，只要看得到嘅地點，都可以走得到，配合寫實環境，整個世界有好高真實感。
睇命中率 再開槍
作為槍戰遊戲當然唔少得大量武器，而且殺敵仲可獲得經驗值提升角色技能，不過講到最特別係AP射擊系統，面對敵人時只要打開戰鬥功能表，時間就會停頓，敵人身上不同部份會列出命中率，可以選擇其中一部份開槍。通常有護甲的胸部面積大，命中率會最高，但射極都死，所以選擇頭部等要害可能更化算，甚至可以揀對方手上武器射，要留意係武器會受距離限制，太遠的命中會低得可憐，呢個時候就要換上狙擊槍應敵。
類型：RPG
遊戲人數：1人
推出日期：10月28日
售價：$299（XB360）/$279（PC）
喪怪！魔法師溝買田買地
《Fable2》屬於動作RPG，玩家可以使用戰士、魔法師及弓箭手等職業。在戰鬥時魔法師使用魔法視覺效果實在無得彈，而且因為有一招控制時間技能，令到被迫埋身機會減低好多，而面對群體攻擊時候，魔法威力亦顯得驚人。除咗戰鬥，當去到城鎮仲有任務可以接，亦可以同村民作各種互動，當存到足夠財富之後，就可以買屋買地，當所有房屋都收歸旗下，就會獲到城主稱號。
類型：RPG
遊戲人數：1人
推出日期：10月21日
售價：$299（標準版）/$329（限量版）
查詢：XBOX（800964215）