韓星安在煥上月燒炭自殺身亡，其遺孀鄭善熙前晚喺首爾警察局，為亡夫死因接受警方近五小時調查，佢否認安在煥因欠債俾大耳窿迫害同囚禁。佢話兩夫婦係藝人，故安在煥失蹤時冇報警。鄭善熙將層樓按畀銀行做擔保，為安在煥借咗近164萬港元，𠵱家層樓將被拍賣，唔少圈中好友正籌錢幫佢度難關。