亞視「2008亞洲小姐競選」噚日喺奧海城舉行第二輪港澳特區賽區面試，上次首輪面試質素真係嚇親唔少街坊，噚日所見嘅21名參賽佳麗，質素都係慘不忍睹，仲相當極端，一係谷胸加虎背熊腰，另一批就平胸兼瘦到似竹咁，認真騎呢！
當中7號姚鳳鳳係台灣藝人吳建豪同母異父嘅細妹，佢個樣有啲似初出道嘅徐子淇，但身形就好大隻，佢以普通話講：「我經常和吳建豪聯絡，他很支持我又叫我加油。我知道要減肥，特別是坐圍，加上我有水腫，不過信心都OK。」
「范冰冰變石詠莉」
有「凸肚陳奕詩」之稱嘅11號梁詠瑜，臨場先發現唔見咗套自選泳衣，惟有着大會嘅上台。講到之前影到佢喺地鐵撩眼屎，佢話：「冇唔開心，幾搞笑，睇完冇嘢。」佢係內衣模特兒，所以着泳衣都唔覺尷尬。
另一位「岩石胸Monique」5號袁小曼谷到上圍好硬好唔自然，但佢堅稱冇加墊，不過佢個樣的確似蘇永康前緋聞女友Monique。至於「股罅玫瑰」21號譚麗思就話冇諗過個紋身會影響評判對佢嘅印象。1號徐妮雅則以「虎背李珊珊」，絕對有瘦身嘅必要。
評判吳亭欣話：「我睇相見有啲佳麗好似范冰冰咁靚，點知嚟到睇就似石詠莉。」綜藝及資訊副總裁葉家寶話下月10號會公佈12至15個入選佳麗，之後再選五強同內地賽區等佳麗進入12月嘅總決賽，不過咁嘅質素，睇怕評判都幾難揀。
