大馬路上，碰到投資Ａ，行得好快，開玩笑問佢係唔係趕去銀行，投資Ａ話：「呢個時候唔講得笑，我同賓架Ｐ好熟，知道佢間銀行素來穩陣，資本充足比率高過14%，遠遠超過巴塞爾協議嘅要求，佢哋間銀行一定冇事嘅。」香港嘅銀行大都維持幾高嘅資本充足比率，一般高於世界水平，二十年來金管局嘅監管愈來愈嚴，連部門總經理之委任都要得到金管局OK，左丁山就對本地銀行制度好有信心。
問投資Ａ有乜大動作呀？投資Ａ就好好傾咯，立即搵地方坐低，傾耐啲，唔係講投資喎，呢排風大雨大，傾其他嘢冇咁煩惱。原來投資Ａ係爵士音樂發燒友，唔止鍾意聽，仲私人拿出錢來，預備做蝕本生意，搞一個「香港國際爵士音樂節」（HongKongInternationalJazzFestival），請來一流高手BobJames與「上海天使」（AngelsofShanghai）夾Band演出，香港爵士樂手TedLo嘅NewYorkSeason，還有艾美獎得主Yellowjackets等等，於十一月十六日至二十二日在香港不同地方演出，例如Backstage、FringeClub等地方，亦有兩場比較大型嘅演奏會在灣仔伊館舉行（十一月二十日及二十一日），頭炮就係十一月十六日星期日在尖沙嘴文化中心廣場免費表演。
左丁山對爵士音樂唔熟，聽到明與唔明之間，投資Ａ索性叫左丁山上網（www.hkjazz.org）睇清楚。投資Ａ話自己工作多年，人生已無所求，退休後就會投身推廣爵士音樂事業，希望將香港擺上世界爵士樂地圖，成為亞洲最前列嘅爵士音樂中心。佢滿腹大計，希望能以商界經驗籌集資金，成立一個基金，培養本地爵士樂人才及宣揚爵士樂。左丁山勢估唔到呢位老友為咗爵士樂，竟然全身充滿動力，眼裏發光。搵齊幾位世界高手嚟香港，諗吓都頭暈，你估只係燒錢咁簡單乎。會唔會只係吸引到本地外國人參加爵士音樂節呢？投資Ａ話外國人會係觀眾主力，但佢認為本地人應該有不少係爵士樂愛好者，知道之後會踴躍參加，一啲亞洲人可能會因此而專程來港旅行聽爵士音樂喎。投資Ａ如此熱心，謹祝佢好運。