吳鎮宇老婆周日早產一索得男，做咗老竇嘅佢，梗係開心到飛起，前晚同黃秋生、劉青雲及張家輝等好友飲酒慶祝後，噚日下晝一點半佢坐住保母車到養和醫院探老婆，見佢攞住大袋小袋，又有兩壺湯同相機，認真大陣仗，佢話：「上去會同BB影相，佢好得意，諗唔到佢會早咗成兩個星期出世，搞到老婆生時，我唔可以喺佢身邊。」
指青雲恨有BB
至於囝囝嘅中文名，鎮宇話留番畀長輩去改，英文名就改咗叫Feynman，鎮宇笑笑口講：「Feynman係一個我好喜歡嘅科學家，所以個仔都要改呢個名。」15分鐘後，張家輝車住老婆關詠荷嚟醫院，家輝話：「我同老婆嚟睇吓鎮宇一家三口，希望鎮宇做咗老竇後，個人唔好咁癲啦！我會送啲育嬰教材畀佢。」佢哋幾個老友當中，𠵱家只剩青雲未有小朋友，家輝笑住話：「青雲都想生仔，但𠵱家就生咗兩粒瘡。」
家輝又爆鎮宇唔單止鍾意儲紅酒同白酒，最近幾個月仲儲咗好多奶粉，所以個仔唔憂冇靚奶粉飲。探完BB後，家輝離開時又話：「鎮宇個仔個嘴最似老竇，腳仔又好長，都幾可愛。」
大約4點，鎮宇都離開醫院喇，問佢老婆幾時出院？佢答：「等醫生決定啦，我聽日仲搵咗工人嚟醫院照顧老婆，到BB出院後，BB會由老婆自己照顧，唔會請奶媽嚟湊。」
